ورال قالاسىنداعى «اتامەكەن» ونەر ورداسىندا قازاقستان رەسپۋبليكاسىنىڭ كونستيتۋتسياسى كۇنىنە ارنالعان سالتاناتتى جيىن ءوتتى. بۇل مەرەكە – ەلدىڭ تاۋەلسىزدىگى مەن قۇقىقتىق مەملەكەت قۇندىلىقتارىن ايشىقتايتىن ماڭىزدى داتا. ءىس-شاراعا مەملەكەتتىك ورگانداردىڭ وكىلدەرى، ارداگەرلەر، قوعام قايراتكەرلەرى مەن جاستار قاتىستى.
سالتاناتتى شارادا باتىس قازاقستان وبلىسىنىڭ اكىمى ناريمان تورەعاليەۆ ءوز سوزىندە اتا زاڭنىڭ ءمان-ماڭىزىنا ەرەكشە توقتالدى.
«وسىدان وتىز جىل بۇرىن بۇكىلحالىقتىق رەفەرەندۋم ارقىلى قابىلدانعان كونستيتۋتسيا – تاۋەلسىز قازاقستاننىڭ بەرىك تۇعىرى. ول ەلدىڭ بىرلىگىن نىعايتىپ، قوعامداعى تۇراقتىلىقتى ورنىقتىردى، ءاربىر ازاماتتىڭ قۇقىعى مەن بوستاندىعىن قورعاۋدىڭ سەنىمدى كەپىلىنە اينالدى»، – اتاپ ءوتتى ءوڭىر باسشىسى.
سونىمەن قاتار، ن. تورەعاليەۆ مەملەكەت باسشىسى قاسىم-جومارت توقاەۆتىڭ كونستيتۋتسيانىڭ تاريحي ماڭىزىنا بەرگەن جوعارى باعاسىن دا ەسكە سالدى. پرەزيدەنت اتاپ وتكەندەي، قازاق حالقى ەجەلدەن زاڭعا قۇرمەتپەن قاراپ، ادىلدىك پەن ادامگەرشىلىكتى بيىك قويعان. قاسىم حاننىڭ قاسقا جولى، ەسىم حاننىڭ ەسكى جولى، ءاز تاۋكەنىڭ جەتى جارعىسى – ۇلى دالانىڭ جازىلماعان كونستيتۋتسياسى بولىپ، مەملەكەتتىلىك ءداستۇرىن قالىپتاستىرعان.
جيىن بارىسىندا ەلدىڭ الەۋمەتتىك-ەكونوميكالىق دامۋىنا جانە قوعامدىق ومىرگە ەلەۋلى ۇلەس قوسقان بىرقاتار ازاماتقا «قازاقستان رەسپۋبليكاسىنىڭ كونستيتۋتسياسىنا 30 جىل» مەرەكەلىك مەدالى تابىس ەتىلدى.
سالتاناتتى شارا كونستيتۋتسيا كۇنىنە ارنالعان مەرەكەلىك كونتسەرتتىك باعدارلاماعا ۇلاسىپ، ءوڭىردىڭ ونەر ۇجىمدارى ارنايى قويىلىمدارىن ۇسىندى.
