استاناداعى دوستىق ۇيىندە قازاقستان رەسپۋبليكاسى كونستيتۋتسياسىنىڭ 30 جىلدىعىنا ارنالعان «اسسامبلەيا جانە كونستيتۋتسيا: كەلىسىم مەن تۇراقتىلىق جولى» اتتى حالىقارالىق عىلىمي-تاجىريبەلىك كونفەرەنتسيا ۇيىمداستىرىلدى، دەپ حابارلايدى «ادىرنا» ۇلتتىق پورتالى.
جيىنعا Maqsut Narikbayev University پروفەسسورلارى، زاڭگەرلەر، ەتنومادەني بىرلەستىكتەردىڭ وكىلدەرى، ۇكىمەتتىك ەمەس ۇيىمدار، سونداي-اق «اسسامبلەيا جاستارى» رەسپۋبليكالىق قوزعالىسىنىڭ مۇشەلەرى قاتىستى. كونفەرەنتسيانىڭ مودەراتورى – استانا قالالىق قحا توراعاسىنىڭ قوعامدىق ورىنباسارى حاليل ماسلوۆ.
ءىس-شارانى قر پارلامەنتى ءماجىلىسىنىڭ دەپۋتاتى ولجاس قۇسپەكوۆ قۇتتىقتاۋ سوزبەن اشىپ، كونستيتۋتسيانىڭ مەملەكەت ىرگەتاسى رەتىندەگى تاريحي رولىنە توقتالدى:
«كونستيتۋتسيا ازاماتتاردىڭ قۇقىقتارى مەن بوستاندىقتارىن بەكىتىپ قانا قويماي، ەلىمىزدىڭ دامۋ باعىتىن ايقىندادى. بۇگىندە جاستاردىڭ وسى قۇندىلىقتاردى ساقتاۋداعى جاۋاپكەرشىلىگىن سەزىنۋى وتە ماڭىزدى»، – دەدى ول.
كونفەرەنتسيا بارىسىندا استانا قالاسى قحا توراعاسىنىڭ ورىنباسارلارى حاليل ماسلوۆ پەن نارگيزام ماحمۋدوۆا، الەۋمەتتىك يننوۆاتورلار قاۋىمداستىعىنىڭ پرەزيدەنتى گۇلميرا پارمىشەۆا، ينكليۋزيۆتى قوعامدى دامىتۋ قاۋىمداستىعىنىڭ ۆيتسە-پرەزيدەنتى ءاليا ءسابيتوۆا، «Re Women Astana» ۇيىمىنىڭ وكىلى ساۋلە ساعادي جانە باسقا دا قوعام بەلسەندىلەرى ءسوز الىپ، ءوز ويلارىمەن ءبولىستى.
سپيكەرلەردىڭ ايتۋىنشا، كونستيتۋتسيا – ەلىمىزدىڭ قۇقىقتىق جانە دەموكراتيالىق مەملەكەت رەتىندە قالىپتاسۋىنىڭ، سونداي-اق قوعامدىق كەلىسىم مەن جالپىۇلتتىق بىرلىكتىڭ بەرىك كەپىلى. سونىمەن قاتار قاتىسۋشىلار اتا زاڭنىڭ قازاقستاندىق دامۋ مودەلىندەگى تاريحي ميسسياسىنا ەرەكشە توقتالدى.
