پاۆلودار وبلىسىندا الەۋمەتتىك جەلىدە ءبىر ەر ادامنىڭ قىزعا فيزيكالىق كۇش قولدانعان ءساتى بەينەلەنگەن ۆيدەو جاريالاندى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
ۆيدەودا جابىرلەنۋشىنىڭ بەت-اۋزى قان بولىپ، ەر ادامنىڭ داۋسى ەستىلەتىنى كورىنەدى. ول قىزدىڭ بىرەۋدى الداعانىن ايتقان. بۇل دەرەككە پوليتسيا پىكىر ءبىلدىردى.
پوليتسيا مالىمەتىنشە، ۆيدەونى تەكسەرۋ بارىسىندا وقيعاعا قاتىسى بار تۇلعالار انىقتالىپ، پوليتسيا بولىمشەسىنە جەتكىزىلدى. الدىن الا مالىمەت بويىنشا، ۆيدەونى جابىرلەنۋشى ءوز تانىستارىمەن كەلىسىپ، ۇيىمداستىرعان بولۋى مۇمكىن. دەگەنمەن "قويىلىم" كەزىندە ناقتى زاڭعا قايشى ارەكەتتەر ورىن العانى بەلگىلى بولدى.
وقيعاعا قاتىسقان ەكى ەر ادامعا ۇساق بۇزاقىلىق بويىنشا اكىمشىلىك حاتتاما تولتىرىلىپ، سوت شەشىمى شىققانعا دەيىن ۋاقىتشا ۇستاۋ يزولياتورىنا قامالدى.
سونىمەن قاتار، جابىرلەنۋشىنىڭ بۇعان دەيىن سوتتالعانى، ونىڭ ىشىندە الاياقتىق بويىنشا جاۋاپقا تارتىلعانى انىقتالدى.
دەگەنمەن، ۆيدەونى ءتۇسىرۋ سەبەپتەرى مەن ونىڭ قويىلىم ەكەندىگىنە قاراماستان، دەنساۋلىققا قاساقانا زيان كەلتىرۋ دەرەگى بويىنشا قىلمىستىق ءىس قوزعالدى. تەرگەۋ بارىسىندا وقيعانىڭ ناقتى سەبەپتەرى، كەلتىرىلگەن زياننىڭ دەڭگەيى جانە ءار قاتىسۋشىنىڭ ءرولى انىقتالاتىن بولادى. وقيعاعا قاتىسۋشىلاردىڭ، سونداي-اق ۆيدەونى تاراتقان تۇلعالاردىڭ ارەكەتتەرىنە قۇقىقتىق باعا بەرىلەدى.
