«جولاۋشىلار تاسىمالى» اق 60 جاستان اسقان جولاۋشىلارعا ارنالعان جاڭا جەڭىلدىك باعدارلاماسىن ىسكە قوستى، دەپ حابارلايدى "ادىرنا".
ۇلتتىق تاسىمالداۋشىنىڭ مالىمەتىنشە، ەندى 60 جاستان اسقان جولاۋشىلار پويىز بيلەتىن 25 پايىز جەڭىلدىكپەن ساتىپ الىپ، ەل ىشىندە ساياحاتتاي الادى. ول ءۇشىن بارلىق پويىزعا جارامدى ديسكونت كارتاسىن راسىمدەۋ جەتكىلىكتى.
سونداي-اق جاستار ءۇشىن دە ءتيىمدى مۇمكىندىكتەر ۇسىناتىن جاڭا ديسكونت كارتاسى ەنگىزىلگەن. بۇل ديسكونت كارتا ارقىلى 15 پەن 25 جاس ارالىعىنداعى جولاۋشىلار كۋپە ۆاگوندارىنداعى جوعارعى ورىندار مەن وتىراتىن ۆاگوندارعا بيلەتتەردى 33 پايىز جەڭىلدىكپەن راسىمدەي الادى.
"ديسكونتتىق كارتالار يەسىنىڭ اتىنا راسىمدەلەدى جانە ءۇشىنشى تۇلعالاردىڭ پايدالانۋىنا جول بەرىلمەيدى. كارتانى تەك تەمىرجول ۆوكزالدارىنداعى "جولاۋشىلار تاسىمالى" اق بيلەت كاسسالارىنان الۋعا بولادى. راسىمدەۋ ءۇشىن جەكە كۋالىك، ۇيالى تەلەفون ءنومىرى جانە ەلەكتروندىق پوشتا (قالاۋ بويىنشا) مەكەنجايى تالاپ ەتىلەدى", - دەلىنگەن حابارلامادا.
ديسكونتتىق كارتا بويىنشا جەڭىلدىكتەر بيلەت كاسسالارىندا نەمەسە bilet.railways.kz سايتى ارقىلى بيلەت ساتىپ الىنعان جاعدايدا عانا قولدانىلادى. ەكىنشى دەڭگەيلى بانكتەردىڭ پلاتفورمالارى ارقىلى ساتىپ الىنعان بيلەتتەرگە جەڭىلدىكتەر قاراستىرىلمايدى.
جەڭىلدىكتەر جىل سايىن بەلگىلەنگەن كەزەڭدە ۇسىنىلادى. الايدا مەرەكەلىك جانە كانيكۋل ۋاقىتىندا ديسكونتتىق كارتالاردىڭ قولدانىلۋى توقتاتىلادى:
- 2026 جىلعى 20-29 ناۋرىز ارالىعى;
- 2026 جىلعى 25-30 جەلتوقسان ارالىعى;
- ماۋسىم-تامىز ايلارى.
