مەملەكەتتىڭ باس سانيتارى جانداربەك بەكشين لوكداۋن كەزىندە بولعان ۇلكەن قاتەلىكتەردى اتاپ كورسەتتى دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.
جۋرناليستەرمەن وتكەن ونلاين بريفينگ بارىسىندا بەكشين: «قوعامدىق كولىكتەردىڭ ءجۇرۋ ۋاقىتىن ساعات 18.00 گە دەيىن شەكتەۋ شارالارى ۇلكەن قاتەلىك بولدى دەپ سانايمىن. جۇمىسقا بارۋدىڭ نەگىزگى ۋاقىتى تاڭعى 7.00- دەن 10.00-عا دەيىن جانە قايتۋ ۋاقىتى كەشكە 17.00-دەن 20.00 ارالىعى. اۆتوبۋستار ۋاقىتىن شەكتەۋ سالدارىنان ادامداردىڭ ايالدامالاردا كوپتەپ شوعىرلانۋى، اۆتوبۋستاردا تىعىلىسىپ وتىرۋى سياقتى جاعدايلار بولدى. ال جەكسەنبى كۇندەرى ىندەت ءوسۋ كورسەتكىشى تومەن بولدى»،-دەدى. وسىعان بايلانىستى ۆەدومستۆو وتكەن تاجىريبە قاتەلىگىنەن ساباق الىپ، قوعامدىق كولىكتىڭ ءجۇرىسى تۇراقتالعانىن مالىمدەدى.
باس سانيتاردىڭ بۇل ايتقان قاتەلىكتەرىنەن بولەك لوكداۋن كەزىندە تاعى قانداي قاتەلىكتەرگە جول بەرىلگەنىنە سىرت كوزدىڭ پىكىرى قانداي؟ ماسەلەن، شىمكەنتتىك زەينەتكەر سارا اپا: «كارانتين دەپ جاريالاپ الىپ، بازار جۇمىستارىن بەيبەرەكەت ەتتى. شىمكەنتتە ادام كوپتەپ باراتىن بازارلار تۇسىنىكسىز ۋاقىتتا جۇمىس ىستەدى. سونىڭ سالدارىنان ادامدار ىعى-جىعى بولىپ ءجۇردى. ۆيرۋستىڭ تارالۋى سول كەزدە وسكەن دە شىعار دەپ ويلايمىن»،- دەيدى. ال اتىراۋلىق وقىرمانىمىز اسىلجان: «كافەلەردى اشىپ، مونشا مەن شاشتارازدىڭ ۋاقىتىن شەكتەۋدى قاتەلىك دەپ سانايمىن. جۇرت شاشىن كەستىرىپ، جۋىنىپ شايىنباي، كافەلەردە دەمالىپ وتىرسىن دەدى مە، تۇك تۇسىنبەيمىن»، -دەپ كۇلەدى.
تۇركىستان وبلىسىنىڭ ازاماتى اۋەلحان شونجان: «جالپى، ءبىزدىڭ ەلدە قاتە ەمەس دۇنيە بار ما؟ «كارانتين» دەپ قويىپ، تالاي تويحانا جۇزدەگەن ادامعا تىعىلىپ توي جاساۋدا. قۇدالىعىڭ دا، بەتاشارىڭ دا، جانازاڭ دا ءبارى بۇرىنعىسىنشا ءوتىپ جاتىر. الگى ۆيرۋسىڭ كوپشىلىك جينالعان جەردەن جۇعادى دەسە، وندا بيلىك شەكتەۋ شاراسىنىڭ ءوزىن دۇرىس قويىپ وتىرماعانىن كورەسىڭ. ەلىمىزدەگى ءبىر مەكتەپكە بالا بارىپ وقىسا، ەندى ءبىر مەكتەپتىڭ ەسىگىندە قارا قۇلىپ تۇر. اينالايىندار-اۋ، سوندا نەمەنە الگى كوروناۆيرۋس «مىناۋ مەكتەپكە بارام، اناۋ مەكتەپكە بارمايمىن» دەپ تاڭداۋ جاسايتىن بولعانى ما؟ ادامنىڭ اقىلىنا كەلەتىن شەكتەۋ تۇرلەرىن ەنگىزۋ كەرەك قوي!»-دەپ كۇيىنەدى.
قازاقستاندا كارانتيندىك شارالار ءالى دە جالعاسۋدا. بىرقاتار نىساندار ءالى كۇنگە تولىقتاي ىسكە قوسىلمادى. دەسەك تە، قاي وڭىرگە بارساڭىز دا، جۇرتتىڭ «كوروناۆيرۋستى الدەقاشان ۇمىتقانىن» بايقايسىز. الىسقا ۇزاماي-اق، پويىزعا وتىرىڭىزشى. كەز كەلگەن باعىتتاعى پويىزعا وتىرىپ كورىڭىز. پويىزىڭىز ادامعا لىق تولى. پويىزداردا سانيتارلىق تالاپتار تۋرالى ءسوز ەتۋدىڭ ءوزى ارتىق. بەتپەردە تاعىپ، قازاقستاندىق ەسكى پويىزدا ەشكىم دە تۇنشىعىپ ولگىسى كەلمەيتىنى ءسوزسىز. سوندىقتان پويىزداردا بەتپەردە تاققان ادامدى كورمەيسىز. ال پويىزدىڭ ىشىندە انتيسەپتيكتىڭ ىدىسىن كوزىڭىز شالسا، قولىڭىزدى جۋام دەپ اۋرە بولماڭىز. ويتكەنى سىرتىنا «انتيسەپتيك» دەپ جازىلعان قۇتىنىڭ ءىشى بوس بولۋى ابدەن مۇمكىن. ءدال سول انتيسەپتيكتىڭ بوس قۇتىسى سەكىلدى، قازاقستانداعى كارانتين شارالارى دا اتى-بار، ءوزى-جوق. لوكداۋن كەزىندەگى قاتەلىك تاريحتىڭ قويناۋىنا كەتتى. ەڭ بولماسا، ءدال قازىرگى كەزدەگى كوزگە بادىرايىپ كورىنىپ تۇرعان قاتەلىكتەردى تۇزەتكەن ءجون بولار، ءسىز قالاي ويلايسىز، قۇرمەتتى وقىرمان؟
راۋانا ديماشقىزى،
«ادىرنا» ۇلتتىق پورتالى.
فوتو اشىق دەرەككوزدەن الىندى.
