پرەزيدەنت قاسىم-جومارت توقاەۆ يزرايل مەملەكەتىنىڭ سىرتقى ىستەر ءمينيسترى گيدەون سااردى قابىلدادى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردا حابارلادى.
كەزدەسۋ بارىسىندا قازاقستان پرەزيدەنتى سااردىڭ ساپارى ەكىجاقتى ىنتىماقتاستىقتى نىعايتۋعا ءيزرايلدىڭ بەرىك نيەتىنىڭ ايقىن دالەلى ەكەنىن اتاپ ءوتتى.
اسىرەسە ساۋدا-ەكونوميكالىق، عىلىمي-تەحنيكالىق بايلانىستاردى، جاساندى ينتەللەكت، اۋىل شارۋاشىلىعى جانە سۋ رەسۋرستارىن باسقارۋ سالاسىنداعى بىرلەسكەن جوبالاردى جۇزەگە اسىرۋ ماسەلەلەرىنە باسىمدىق بەرىلدى.
پرەزيدەنت توقاەۆ استانادا وتكەن قازاق-يزرايل بيزنەس-فورۋمى ماڭىزدىلىعىن اتاپ ءوتىپ، ونىڭ ينۆەستيتسيالىق ىنتىماقتاستىقتى دامىتۋعا قوسقان ۇلەسىن ەرەكشە اتادى.
ءوز كەزەگىندە گيدەون ساار ەكىجاقتى قاتىناستاردى جاڭا دەڭگەيگە كوتەرۋگە ءيزرايلدىڭ مۇددەلى ەكەنىن جەتكىزدى. مينيستر قازاقستان پرەزيدەنتىنىڭ اۆراام كەلىسىمدەرىنە قوسىلۋ تۋرالى شەشىمىن جوعارى باعالاپ، بۇل قادامنىڭ حالىقارالىق تۇراقتىلىق پەن ديالوگتى نىعايتۋعا ۇلەس قوساتىنىن اتاپ ءوتتى.
