ادام ومىرىنە اراشا بولىپ، ابزالدىق ۇستانىمان اينىماي قىزمەت ەتىپ كەلە جاتقان نەيروحيرۋرگ، قازاقشىل دارىگەر ءوز وقيعاسىمەن ءبولىستى. ينەنىڭ كوزىندەي كىشكەنە "تىرشىلىك تالشىقتارىن" تارقاتىپ، كوپ جاننىڭ بەتىن بەرى قاراتقان دارىگەردىڭ كاسىبيلىگىنە قۇرمەت تانىتىپ جاتقاندار كوپ. دەگەنمەن دارىگەر ءوزىنىڭ ازاماتتىق وكىنىشىن دە ىشىنە بۇعىپ قالمادى. "ادىرنا" ۇلتتىق پورتالى دارىگەردىڭ ساۋلەلى ساتتەرى مەن ىشكى قىنجىلىسىن باياندايدى.
“3 جەلتوقسان. دەمالىس كۇنى. كوپشىلىكتىڭ جانۇياسىنا ۋاقىت بولەتىن كۇنى. ءبىز بولساق، ادامداردىڭ ومىرىنە ارپالىسۋدامىز. تاڭەرتەڭنەن ءبىر-ەكى شارۋالارىمدى بىتىرگەن سوڭ، تۇسكە تاياعان شاقتا، وڭتۇستىك ءوڭىرىمىزدىڭ بەدەلدى جازۋشىسى مارحابات بايعۇت اعامىزدىڭ جەتى كۇندىك اسىنا قاتىسىپ، قۇران ىشىندە بولدىق. سودان ۇيگە كىرگەنىم سول ەدى تەلەفونىم شىرىلدادى. كەزەكشى دارىگەر، ميدىڭ تامىرى بىتەلىپ، ينسۋلتپەن تۇسكەن ناۋقاس جونىندە باياندادى. باستالعان ۋاقىتىنان 1 ساعات وتكەن ەكەن، سول جاق قول-اياعى سال بولىپ قالىپتى. ميدى قۇتقارۋعا ۇلگەرىپ جاتىرمىز.
كوماندانى جيناپ، وتاعا دايىنداسىن دەگەن تاپسىرما بەرىپ، جۇمىسقا جينالا باستادىم. وتاعا الدىق. وتامىز ءساتتى ءوتتى، ميدىڭ تامىرى اشىلدى. ناۋقاستىڭ ىستەمەي تۇرعان قول-اياعى وتا ۇستەلىنىڭ ۇستىندە قالىپقا كەلدى. شىقسام تۋىستارى تۇر ەكەن. جاعدايدىڭ بارلىعىن اشىپ ايتتىم. قۋانىپ قالدى.سول مەزەتتە تەلەفونىم قايتا شىرىلدادى. كەزەكشى دارىگەر ميعا قان قۇيىلۋمەن ناۋقاس ءتۇسىپ جاتىر دەدى. استىنا ءتۇسىپ توموگرافيادا جاسالعان سۋرەتتەردى قاراپ شىعىپ، انەۆريزماسى جىرتىلعان دەگەن بولجامعا كەلدىك. وتاعا دايىنداڭىزدار دەدىم.تۋىستارىنا ءمان-جايدى ءتۇسىندىرىپ، ناۋقاستى وتاعا الدىق. ناۋقاستا ويلاعانىمىزداي اق انەۆريزماسى جىرتىلىپ كەتكەن ەكەن، بىراق ودان دا بولەك ارتەريوۆەنوزدى-مالفورماتسياسى بار ەكەن. بۇل اقاۋ ميدا قالىپتى جاعدايدا كەزدەسپەيتىن شيماقتالعان تامىرلاردىڭ اقاۋى، انەۆريزمانىڭ پايدا بولۋىنىڭ سەبەبى دە سودان بولسا كەرەك. وتا ءساتتى ءوتتى. جىرتىلعان انەۆريزماسىن جاۋىپ تاستادىق. تۋىستارى قۋانىپ قالدى.
بىراق ومىردە بارلىق وتا ويلاعانداي ءساتتى وتپەيدى. كەيدە بىزگە بايلانىسى جوق اسقىنۋلار دا بولىپ جاتادى. ونداي كەزدە ناۋقاستاردىڭ تۋىستارى ءۇشىن سەن جەك كورىنىشتى بولاسىڭ.تۇسىنەتىنى بار، تۇسىنبەيتىنى بار. كاسىبىمىزدىڭ بار قيىندىعىن سول مەزەتتە تۇسىنەسىڭ. جۇرەگىڭ قىنجىلىپ تۇرسا دا، تۋىستارى قارعىس ايتىپ جاتادى. امال قانشا، ومىردە ونداي مەزەتتەر سيرەك تە بولسا، وكىنىشكە قاراي، بولىپ تۇرادى”.
دارىگەردىڭ ءوزى بايانداعان وقيعانى وقىپ، جۇرەگى ەلجىرەپ جاتقان جاندار كوپ:
"بارەكەلدى، قازاقتان مىقتى دارىگەرلەر شىقتى", "وڭاي ەمەس. بىلىكتى، مىقتى قازاقتار جاساي بەرسىن!", "ادام جانىنا اراشا تۇسەر اق حالاتتى ابزال جاندار امان بولسىن!", "باۋىرىمنىڭ باسىنا اماندىق تىلەيمىن!", - دەپ جازدى قالىڭ كوپشىلىك.
"ادىرنا" ۇلتتىق پورتالى
