استانادا Solana مۋلتيفورماتتىق مۋزىكالىق فەستيۆالىنىڭ العاشقى ماۋسىمىنا جانە Solana City ستراتەگيالىق جوباسىنا ارنالعان رەسمي پرەسس-كونفەرەنتسيا ءوتتى. ءىس-شاراعا فەستيۆال ۇيىمداستىرۋشىلارى، سەرىكتەستەر، مەملەكەتتىك ورگاندار مەن بۇقارالىق اقپارات قۇرالدارىنىڭ وكىلدەرى قاتىستى، دەپ حابارلايدى «ادىرنا» ۇلتتىق پورتالى.
پرەسس-كونفەرەنتسيا بارىسىندا فەستيۆالدىڭ نەگىزگى كونتسەپتسياسى مەن فورماتى، قاۋىپسىزدىك پەن لوگيستيكا ماسەلەلەرى، سونداي-اق Solana City جوباسىنىڭ دامۋ پەرسپەكتيۆاسى جان-جاقتى تانىستىرىلدى.
ەۋرازيالىق بانكتىڭ قولداۋى: بيزنەس پەن كرەاتيۆتى يندۋسترياعا سەرپىن
فەستيۆالدىڭ سەرىكتەستەرىنىڭ ءبىرى — ەۋرازيالىق بانك وكىلى شاعىن جانە ورتا بيزنەستى قولداۋ بانكتىڭ باستى باعىتتارىنىڭ ءبىرى ەكەنىن اتاپ ءوتتى. ونىڭ ايتۋىنشا، Solana جوباسى «دامۋ» قورىنىڭ قولداۋىمەن، ياعني مەملەكەتتىك قولداۋ اياسىندا جۇزەگە اسىرىلىپ وتىر. جوباعا بانك تاراپىنان قارجىلىق قۇرالدار، سونىڭ ىشىندە بانكتىك كەپىلدىكتەر ۇسىنىلعان.
سونداي-اق، بانك وكىلى مەديا جانە كرەاتيۆتى يندۋستريا جوبالارىن قولداۋ ەل ەكونوميكاسىنا وڭ اسەر ەتەتىنىن ايتتى. سەبەبى مۇنداي اۋقىمدى فەستيۆالدەر قازاقستانعا ءتۇرلى ەلدەر مەن وڭىرلەردەن تۋريستەردىڭ كەلۋىنە ىقپال ەتەدى.
«Solana — اۋقىمى كەڭ جوبا. فەستيۆالگە تەك جەرگىلىكتى كورەرمەندەر عانا ەمەس، ەلىمىزدىڭ بارلىق وڭىرلەرىنەن جانە شەتەلدەن قوناقتار كەلەدى دەپ كۇتىلۋدە. ءبىز بۇل جوباعا ۇيىمداستىرۋشىلىق سەرىكتەس رەتىندە عانا ەمەس، كورەرمەندەرگە دە قولداۋ كورسەتەمىز»، — دەدى بانك وكىلى. ونىڭ ايتۋىنشا، فەستيۆال بيلەتتەرىن ەۋرازيالىق بانك كارتالارىمەن ساتىپ العان كورەرمەندەرگە 35 پايىزعا دەيىن بونۋس قاراستىرىلعان. بۇل بونۋستاردى كەيىن تاۋارلار مەن قىزمەتتەردى تولەۋگە پايدالانۋعا بولادى.
Shanyraq Properties: ينۆەستيتسيا، تۋريزم جانە الەۋمەتتىك باستاما
فەستيۆال سەرىكتەستەرىنىڭ ءبىرى — Shanyraq Properties كومپانياسىنىڭ وكىلى داۋرەن قايىرجانۇلى كومپانيانىڭ ينۆەستيتسيالىق باعىتتا جۇمىس ىستەيتىنىن جانە Solana سەكىلدى جوبالار ارقىلى ءتۋريزمدى دامىتۋعا ۇلەس قوسىپ جاتقانىن ايتتى. سونىمەن قاتار، ول جۋىردا ىسكە قوسىلعان Shanyraq Kids الەۋمەتتىك باستاماسى تۋرالى دا ءسوز قوزعادى. جوبا ءارتۇرلى سەبەپتەرمەن ءبىلىمىن جالعاستىرا الماعان، الايدا ەرەكشە قابىلەتى بار دارىندى بالالاردى قولداۋعا باعىتتالعان. كومپانيا مۇنداي بالالارعا قارجىلاي دەمەۋشىلىك كورسەتىپ، ولاردىڭ ءبىلىم الۋىنا مۇمكىندىك بەرۋدى كوزدەيدى.
«Kazakh Tourism» ۇق» اق باسقارما توراعاسىنىڭ ورىنباسارى دانيەل سەرجانۇلى Solana Fest ەلىمىزدىڭ تۋريستىك الەۋەتىن ارتتىراتىن ماڭىزدى جوبا ەكەنىن اتاپ ءوتتى. ونىڭ ايتۋىنشا، فەستيۆال اياسىندا 50 مىڭعا جۋىق قوناق كۇتىلەدى، ولاردىڭ ەداۋىر بولىگى — شەتەلدىك تۋريستەر. قازىرگى تاڭدا رەسەي، قىرعىزستان، وزبەكستان، ءۇندىستان جانە وزگە دە ەلدەردەن قىزىعۋشىلىق بايقالىپ وتىر.
«مەملەكەت تاراپىنان Solana Fest سياقتى جوبالاردى قولداۋعا دايىنبىز. تۋروپەراتورلارمەن بىرلەسىپ، 3–5 كۇندىك تۋرپاكەتتەر ازىرلەۋ، ارنايى شتاب قۇرۋ جۇمىستارى جوسپارلانىپ وتىر. بۇل — ەلىمىزدى حالىقارالىق دەڭگەيدە تانىتۋدىڭ ۇلكەن مۇمكىندىگى»، — دەدى ول.
سونداي-اق، Solana City جوباسى ءىرى ينۆەستيتسيالىق باستاما رەتىندە باعالانىپ وتىر. جوبا ۇلتتىق ناقىشتا ازىرلەنىپ، قالانىڭ تۋريستىك ەكوجۇيەسىن تولىقتىرۋعا جانە تۋريستەر لەگىن ارتتىرۋعا باعىتتالعان.
Solana City: ەتنوتۋريزم مەن كەمپينگ ايماعى
جوبا اياسىندا سەرىكتەس گولف-كلۋب تاراپىنان 30 گەكتار اۋماق بولىنگەن. مۇندا شامامەن 40 كيىز ۇيدەن تۇراتىن ەتنوقالاشىق سالىنىپ، حالىقارالىق دەڭگەيدەگى تۋريستىك ايماق قالىپتاستىرۋ جوسپارلانىپ وتىر. سونىمەن قاتار، كەمپينگ ايماقتارىن دامىتۋ دا كوزدەلگەن.
Solana Fest — ءبىر ءارتىستىڭ كونتسەرتى ەمەس، بىرنەشە الەمدىك جۇلدىز باس قوساتىن اۋقىمدى فەستيۆال. بيىلعى ماۋسىمدا ساحناعا Tyga, Busta Rhymes, Flo Rida, Nicole Scherzinger, Keri Hilson جانە Timbaland شىعادى. ۇيىمداستىرۋشىلار قۇپيا قوناقتىڭ دا بولاتىنىن مالىمدەدى.
فەستيۆال جىلىنا ەكى رەت — مامىر جانە تامىز ايلارىندا وتەدى. بيىلعى شارا ساعات 19:00-دە باستالىپ، 23:00-گە دەيىن جالعاسادى. بيلەت قۇنى 25 000 تەڭگەدەن 160 000 تەڭگەگە دەيىن. بيلەتتەر تەك رەسمي سايت ارقىلى ساتىلادى.
