25 ساۋىردە جامبىل وبلىسى، تالاس اۋدانىندا «قىزعالداق مۇرا» حالىقارالىق فەستيۆالى وتەدى. بۇل ءىس-شارا جامبىل وبلىسىنىڭ گرەيگ قىزعالداعىنىڭ وتانى رەتىندە الەمدىك قاۋىمداستىققا تانىتۋعا جانە وڭىردەگى بيوالۋانتۇرلىلىكتى ساقتاۋ ستراتەگياسىن جۇزەگە اسىرۋعا باعىتتالعان.
فەستيۆالدىڭ ماقساتى – ءوڭىردىڭ تۋريستىك الەۋەتىن تانىتۋ، تابيعي قىزعالداق لاندشافتتارىن ساقتاۋ جانە ونى ءوڭىر برەندى رەتىندە دامىتۋ. ءىس-شاراعا وتاندىق جانە شەتەلدىك ساراپشىلار، عالىمدار، حالىقارالىق ۇيىمداردىڭ وكىلدەرى قاتىسادى.
فەستيۆال بارىسىندا تابيعي تازا قىمىزدىڭ ءدامىن تاتىپ، ونىڭ دايىندالۋ ادىستەرىمەن تانىسۋ ماقساتىندا «قىمىزمۇرىندىق» ءراسىمى، قولونەر كورمەسى مەن ساۋدا جارمەڭكەسى، ءتۇرلى ۇلتتىق ويىندار،كونتسەرتتىك باعدارلامالار ۇيىمداستىرىلادى.
فەستيۆال اياسىندا حالىقارالىق ىنتىماقتاستىق شەڭبەرىندە ەرەكشە باستاما – نيدەرلاند كورولدىگىنەن جامبىل وبلىسىنا 40 000 دانا قىزعالداق تۇقىمى سىيعا تارتۋ جوسپارلانىپ وتىر. بۇل قىزعالداقتار ءوڭىر اۋماعىندا وتىرعىزىلىپ، بولاشاقتا ايماقتىڭ تابيعي كەلبەتىن كوركەيتۋگە جانە تۋريستىك تارتىمدىلىعىن ارتتىرۋعا ۇلەس قوسادى.
فەستيۆال وڭىرلىك ەكونوميكانىڭ دامۋىنا، ونىڭ ىشىندە ىشكى جانە حالىقارالىق ءتۋريزمدى دامىتۋعا، حالىقارالىق مادەني، عىلىمي بايلانىستاردى نىعايتۋعا ىقپال ەتەدى.
