ايتىسكەر اقىن جانداربەك بۇلعاقوۆ الەۋمەتتىك جەلىدە ءانشى Yenlik ءانىن تالقىلاپ، سىنعا ۇشىرادى، دەپ حابارلايدى “ادىرنا” ۇلتتىق پورتالى.
اقىن BIPL انىنە قاتىستى ايتقان سىنىنان كەيىن تۋىنداعان پىكىرتالاسقا جاۋاپ بەردى.
اقىن Threads الەۋمەتتىك جەلىسىندەگى پاراقشاسىندا تاراعان تالقىلاۋلارعا تۇسىنىكتەمە بەرىپ، باستاپقىدا قويىلعان سۇراق تەك ءاننىڭ مازمۇنىنا قاتىستى بولعانىن اتاپ ءوتتى. ونىڭ ايتۋىنشا، پىكىر بىلدىرۋشىلەردىڭ ءبىر بولىگى ءاننىڭ ماعىناسىن تۇسىنگەنىن نەمەسە تۇسىنبەگەنىن بايىپپەن جەتكىزگەن.
«جارىقتىق Threads پاراقشام ءبىر اۋناپ ءتۇسىپتى عوي. ال، تالاڭدار مەنى، قازىر جاۋاپ بەرەمىن.
بىرىنشىدەن، “بۇل قاي ءان؟ كىم نە ءتۇسىندى؟” دەگەن سۇراق قويىلدى. وعان “بۇل — ەڭلىكتىڭ ءانى، ماعىناسى وسىنداي” نەمەسە “دىم تۇسىنبەدىم” دەپ ساۋاتتى، سالقىنقاندى جاۋاپ بەرگەندەر بار. نەگىزگى شارۋا سونىمەن ءبىتتى»، — دەپ جازدى ول.
سونىمەن قاتار جانداربەك بۇلعاقوۆ وزىنە تاعىلعان «قىز بالانى سىنادى» دەگەن ايىپتاۋلارمەن كەلىسپەيتىنىن ءبىلدىردى. ايتىسكەردىڭ ايتۋىنشا، ول ونەرپازدىڭ جەكە تۇلعاسىنا ەمەس، تەك شىعارمانىڭ تاقىرىبى مەن ماتىنىنە نازار اۋدارعان.
«ونەرپازدىڭ جىنىسى، سىر-سىمباتى، تۇلعاسى مەن انشىلىگى تۋرالى ءبىر اۋىز ءسوز ايتىلعان با؟ تاقىرىپ ءماتىن ەمەس پە؟» — دەپ تۇيىندەدى اقىن.
