قازاقستاندىق ءانشى ءمولدىر اۋەلبەكوۆا جەلىدەگى پاراقشاسىندا كەشYou توبىنىڭ 29 مامىرعا جوسپارلانعان مەرەيتويلىق كونتسەرتىنە قاتىسپايتىنىن جازدى، دەپ حابارلايدى "ادىرنا" ۇلتتىق پورتالى.
ءانشى 2006 جىلى توپتىڭ العاشقى قۇرامىندا ونەر كورسەتىپ، پروديۋسەرى بايان الاگوزوۆا بولعان جوبادا شىعارماشىلىق جولىن باستاعان. كەيىن ول جەكە مانسابىنا كوڭىل ءبولىپ، بىرنەشە رەت توپتان كەتىپ، قايتا ورالعان. ءوز جازباسىندا ءمولدىر اۋەلبەكوۆا بۇل شەشىمدى سانالى تۇردە قابىلداعانىن اتاپ ءوتتى.
«مەنسىز دە بۇل كەش تاماشا وتەتىنىنە سەنىمدىمىن. وسىلايشا شىعارماشىلىق جولىمداعى بۇل كەزەڭدى جابامىن»، – دەدى ول.
سونىمەن قاتار ءانشى 22 جىلدىق شىعارماشىلىق جولىندا ءتۇرلى كەزەڭدەردەن وتكەنىن ايتىپ، ساحنادا عانا ەمەس، باسقا سالالاردا دا ەڭبەك ەتكەنىن جەتكىزدى. ول ارىپتەستەرىنە جانە تىڭدارماندارىنا العىس ءبىلدىرىپ، كەشYou كونتسەرتىنە قاتىسپايتىنىن ايتتى. ءانشى تىڭدارمانىن جەكە كونتسەرتىندە كەزدەسۋگە شاقىردى.
الايدا بۇل مالىمدەمەگە پروديۋسەر بايان الاگوزوۆا الەۋمەتتىك جەلىدە قاتاڭ جاۋاپ بەردى. ول اۋەلبەكوۆانى سىنعا الىپ، ونىڭ شەشىمىن كۇتپەگەن ارەكەت دەپ باعالاعان.
«ەندى ساعان مەنى جانە مەنىڭ ەڭبەگىمدى ەلەمەۋگە جول بەرمەيمىن. ونىڭ نەگە ساتقىن ەكەنىن ايتاتىن ۋاقىت كەلگەن شىعار»، – دەپ جازدى پروديۋسەر.
ايتا كەتەيىك، اتالعان جاعداي الەۋمەتتىك جەلىلەردە قىزۋ تالقىلانىپ جاتىر.
