«تازا قازاقستان» رەسپۋبليكالىق اكتسياسى اياسىندا قاراعاندى وبلىسىنىڭ جرو وكىلدەرى مەكتەپ وقۋشىلارىنا ارنالعان تانىمدىق ەكولوگيالىق ءدارىس وتكىزدى. ءىس-شارانىڭ ماقساتى — وسكەلەڭ ۇرپاقتىڭ ەكولوگيالىق مادەنيەتىن قالىپتاستىرۋ، قورشاعان ورتانى قورعاۋعا جاۋاپكەرشىلىكتى ارتتىرۋ، اۋماقتاردى كوگالداندىرۋ جانە ءوڭىر تۇرعىندارى ءۇشىن قولايلى ءومىر ءسۇرۋ ورتاسىن قالىپتاستىرۋ.
كەزدەسۋگە ءا. بوكەيحان اتىنداعى جالپى ءبىلىم بەرەتىن مەكتەپتىڭ وقۋشىلارى قاتىستى. ءدارىس بارىسىندا ماماندار تابيعاتقا ۇقىپتى قاراۋدىڭ ماڭىزدىلىعىن، تابيعي رەسۋرستاردى پايدالانۋداعى جاۋاپكەرشىلىكتى ءتۇسىندىرىپ، سونداي-اق تۇتىنۋدى وڭتايلاندىرۋ مەن قالدىقتاردى دۇرىس سۇرىپتاۋ جانە قايتا وڭدەۋ بويىنشا پراكتيكالىق كەڭەستەر بەردى.
ۇيىمداستىرۋشىلار «تازا قازاقستان» اكتسياسىنىڭ ەل اۋماعىن تولىق قامتيتىنىن اتاپ ءوتتى.
«ەكولوگيالىق مادەنيەت قاراپايىم، بىراق سانالى ارەكەتتەردەن باستالادى. قورشاعان ورتانىڭ تازالىعىن ساقتاۋ، قالدىقتاردى سۇرىپتاۋ، اعاش وتىرعىزۋ — ءار ازاماتتىڭ ەلىمىزدىڭ ورنىقتى بولاشاعىنا قوسقان جەكە ۇلەسى»، — دەدى ءىس-شارا ۇيىمداستىرۋشىلارى.
مۇنداي باستامالار جاستاردىڭ قورشاعان ورتاعا دەگەن جاۋاپتى كوزقاراسىن قالىپتاستىرىپ، بەلسەندى ازاماتتىق ۇستانىمنىڭ نىعايۋىنا ىقپال ەتەدى.
