قاراعاندى وبلىسىندا فەرمەر ءوز ەگىستىگىنە كىرىپ كەتكەن ءبىر ءۇيىر جىلقىنى اتىپ تاستاعان. وقيعا 28 قىركۇيەكتە نۇرا اۋدانىنا قاراستى زارەچنوە اۋىلىنىڭ ماڭىندا بولدى. بۇل تۋرالى «ۆەچەرنيايا كاراگاندا» Telegram-ارناسىندا جاريالادى، دەپ حابارلايدى «ادىرنا».
اقپاراتقا سايكەس، وقيعا ورنىنان وق تيگەن 17 باس جىلقى تابىلعان، ولاردىڭ 14-ءى سول جەردە ءولىپ قالدى.
«كۋاگەردىڭ ايتۋىنشا، جەرگىلىكتى فەرمەر جىلقىلاردى كولىكپەن قۋىپ ءجۇرىپ، وق اتقان. كەيىن وقيعا ورنىنان ءىزىن سۋىتقان. مالىنان ايىرىلعان اۋىل تۇرعىندارى كۇدىكتى جازادان قۇتىلىپ كەتەدى دەپ قورقىپ وتىر، سەبەبى ول – اۋقاتتى ادام»، — دەلىنگەن حابارلامادا.
قاراعاندى وبلىستىق پوليتسيا دەپارتامەنتى وقيعانىڭ بولعانىن راستادى. قۇقىق قورعاۋ ورگاندارىنىڭ مالىمەتىنشە، «بوتەننىڭ مۇلكىن قاساقانا جويۋ» بابى بويىنشا قىلمىستىق ءىس قوزعالعان.
«53 جاستاعى نۇرا اۋدانىنىڭ تۇرعىنى كۇدىكتى رەتىندە انىقتالىپ، پوليتسيا بولىمىنە جەتكىزىلدى. قازىر بارلىق ءمان-جاي تولىق ءارى وبەكتيۆتى انىقتاۋ ءۇشىن تەرگەۋ شارالارى جۇرگىزىلىپ جاتىر»، — دەپ حابارلادى ۆەدومستۆو.
زارەچنوە اۋىلىنىڭ تۇرعىندارى كىنالى ادامدى جاۋاپقا تارتۋدى تالاپ ەتىپ وتىر. ولار ءىستىڭ ءادىل تەرگەلۋىنە كۇمانمەن قارايدى جانە تەرگەۋدىڭ سوزىلىپ كەتۋىنەن قاۋىپتەنىپ وتىر.
