الماتى گارنيزونىنىڭ اسكەري سوتى 2022 جىلعى قاڭتار وقيعاسى كەزىندە ارحەولوگ ەرلان جاعىپاروۆ پەن اۋەز قاپسالانوۆتىڭ ولىمىنە كىنالى دەپ تانىلعان ۇلتتىق ۇلاننىڭ بۇرىنعى پودپولكوۆنيگىنە ۇكىم شىعاردى، دەپ حابارلايدى “ادىرنا” ۇلتتىق پورتالى.
سوت وتىرىسى جابىق رەجيمدە ءوتتى. اسكەري قىزمەتكەرگە قىلمىستىق كودەكستىڭ 451-بابى 2-بولىگىنىڭ 1) تارماعى "اۋىر زارداپتارعا اكەپ سوقتىرعان قارۋدى قولدانا وتىرىپ، بيلىكتى اسىرا پايدالانۋ" بويىنشا ءىس قارالدى.
"سوتتالۋشى بيلىك وكىلى بولا وتىرىپ، ءوز قۇقىقتارى مەن وكىلەتتىكتەرىنەن تىس ارەكەتتەر جاسادى. سالدارىنان اۋىر زارداپتار - ەكى جابىرلەنۋشىنىڭ ولىمىنە الىپ كەلدى", - دەپ جازدى اسكەري سوت.
سوتتالۋشى كىناسىن مويىندامادى.
"سوت شەشىمىمەن سوتتالۋشى 7 جىلعا باس بوستاندىعىنان ايىرىلدى. ول اسكەري اتاعىنان دا ايىرىلدى. جابىرلەنۋشىنىڭ پايداسىنا 20 ملن تەڭگە مورالدىق زالال ءوندىرىلدى", - دەيدى الماتى قالالىق اسكەري سوتى.
سوت ۇكىمى زاڭدى كۇشىنە ەنگەن جوق.
ەسكە سالا كەتەيىك، ەرلان جاعىپاروۆ – ارحەولوگ، تاريحي-مادەني مۇرانى زەرتتەۋشى بولعان. قاڭتار وقيعاسى كەزىندە جوعالىپ كەتىپ، بىرنەشە كۇننەن كەيىن ءمايىتحانادان تابىلدى. مارقۇمنىڭ دەنەسىندە ازاپتاۋ ىزدەرى مەن وق جاراقاتى بولعان.
