ارالدى قۇتقارۋ ماسەلەسى ءالى دە بارشا ادامزات ءۇشىن وزەكتى. بۇل تۋرالى مەملەكەت باسشىسى قاسىم-جومارت توقاەۆ قىزىلوردا قالاسىندا ءوتىپ جاتقان ۇلتتىق قۇرىلتايدىڭ V وتىرىسىندا ايتتى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، قىزىلورداعا كەلىپ، ارال ماسەلەسىنە توقتالماۋ مۇمكىن ەمەس. مەملەكەت باسشىسى جىلدار بويى اتقارىلعان جۇمىستاردىڭ ناتيجەسىندە سولتۇستىك ارالدى ساقتاپ قالۋعا قول جەتكىزىلگەنىن اتاپ ءوتتى.
"جۇرگىزىلگەن جۇيەلى جۇمىستىڭ ارقاسىندا قاشقان تەڭىز قايتىپ، كىشى ارال بىرتىندەپ قالپىنا كەلە باستادى. قازىرگى تاڭدا كوكارال بوگەتىن بيىكتەتۋ شارالارى قولعا الىنىپ جاتىر. جوبا وسى جىلدىڭ سوڭىندا باستالادى. بۇل كىشى ارالداعى سۋدىڭ كولەمىن ەداۋىر ارتتىرۋعا مۇمكىندىك بەرەدى", — دەدى قاسىم-جومارت توقاەۆ.
الايدا پرەزيدەنت بۇل ماسەلە تەك قازاقستاننىڭ قولىندا ەمەس ەكەنىن باسا ايتتى. سەبەبى ەلىمىزدەگى ءىرى وزەندەردىڭ باسىم بولىگى كورشى مەملەكەتتەردىڭ اۋماعىنان باستاۋ الادى.
"داريانىڭ باسىندا تۇرعان ەلدەردىڭ سۋ ساياساتىنا بايلانىستى سىرداريا سۋى تەڭىزگە ءار جىلدارى ءارتۇرلى كولەمدە جەتەدى. سوندىقتان كوپتەگەن تۇيتكىلدىڭ شەشىمى سۋ سالاسىنداعى ساۋاتتى ديپلوماتياعا بايلانىستى", — دەدى مەملەكەت باسشىسى.
پرەزيدەنتتىڭ سوزىنشە، قازىرگى تاڭدا ورتالىق ازيا ەلدەرىمەن سۋ رەسۋرستارىن بىرلەسىپ پايدالانۋ جونىندە كەلىسىمدەر جاسالعان. دەگەنمەن، ارالمەن قاتار كاسپيدىڭ، بالقاشتىڭ، ەرتىستىڭ دە تاعدىرىن شەشۋ ءۇشىن كورشىلەرمەن تۇراقتى مامىلەگە كەلۋ قاجەت.
"سۋ — ەلىمىز ءۇشىن ستراتەگيالىق رەسۋرس. ءبىز بۇل ماسەلەمەن جۇيەلى ءارى ۇزاق مەرزىمدى نەگىزدە اينالىسۋىمىز كەرەك. بىلتىر بۇۇ اياسىندا حالىقارالىق سۋ ۇيىمىن قۇرۋدى ۇسىندىم. الداعى ءساۋىر ايىندا استانادا وتەتىن حالىقارالىق ەكولوگيا سامميتىندە ارالدى قۇتقارۋ قورىنىڭ مۇشەلەرىمەن وسى ماسەلەنى تالقىلايمىز", — دەدى پرەزيدەنت.
مەملەكەت باسشىسى كىشى ارالدىڭ تولىق قالپىنا كەلۋى بۇكىل سىر ءوڭىرىنىڭ الەۋمەتتىك-ەكونوميكالىق دامۋىنا سەرپىن بەرەتىنىنە ءۇمىت ءبىلدىردى.
