Araldy qūtqaru mäselesı älı de barşa adamzat üşın özektı. Būl turaly Memleket basşysy Qasym-Jomart Toqaev Qyzylorda qalasynda ötıp jatqan Ūlttyq qūryltaidyŋ V otyrysynda aitty, dep habarlaidy "Adyrna" ūlttyq portaly.
Prezidenttıŋ aituynşa, Qyzylordaǧa kelıp, Aral mäselesıne toqtalmau mümkın emes. Memleket basşysy jyldar boiy atqarylǧan jūmystardyŋ nätijesınde Soltüstık Araldy saqtap qaluǧa qol jetkızılgenın atap öttı.
"Jürgızılgen jüielı jūmystyŋ arqasynda qaşqan teŋız qaityp, Kışı Aral bırtındep qalpyna kele bastady. Qazırgı taŋda Kökaral bögetın biıktetu şaralary qolǧa alynyp jatyr. Joba osy jyldyŋ soŋynda bastalady. Būl Kışı Araldaǧy sudyŋ kölemın edäuır arttyruǧa mümkındık beredı", — dedı Qasym-Jomart Toqaev.
Alaida Prezident būl mäsele tek Qazaqstannyŋ qolynda emes ekenın basa aitty. Sebebı elımızdegı ırı özenderdıŋ basym bölıgı körşı memleketterdıŋ aumaǧynan bastau alady.
"Dariianyŋ basynda tūrǧan elderdıŋ su saiasatyna bailanysty Syrdariia suy teŋızge är jyldary ärtürlı kölemde jetedı. Sondyqtan köptegen tüitkıldıŋ şeşımı su salasyndaǧy sauatty diplomatiiaǧa bailanysty", — dedı Memleket basşysy.
Prezidenttıŋ sözınşe, qazırgı taŋda Ortalyq Aziia elderımen su resurstaryn bırlesıp paidalanu jönınde kelısımder jasalǧan. Degenmen, Aralmen qatar Kaspiidıŋ, Balqaştyŋ, Ertıstıŋ de taǧdyryn şeşu üşın körşılermen tūraqty mämılege kelu qajet.
"Su — elımız üşın strategiialyq resurs. Bız būl mäselemen jüielı ärı ūzaq merzımdı negızde ainalysuymyz kerek. Byltyr BŪŪ aiasynda Halyqaralyq su ūiymyn qūrudy ūsyndym. Aldaǧy säuır aiynda Astanada ötetın Halyqaralyq ekologiia sammitınde Araldy qūtqaru qorynyŋ müşelerımen osy mäselenı talqylaimyz", — dedı Prezident.
Memleket basşysy Kışı Araldyŋ tolyq qalpyna keluı bükıl Syr öŋırınıŋ äleumettık-ekonomikalyq damuyna serpın beretınıne ümıt bıldırdı.
