ماڭعىستاۋ وبلىسىندا كاسپي تەڭىزىنە شومىلۋ كەزىندە سۋعا باتىپ كەتتى دەگەن بولجاممەن 27 جاستاعى ەر ادامدى ىزدەۋ جۇمىستارى جالعاسۋدا، دەپ حابارلايدى "ادىرنا".
وقيعا اقتاۋدان شامامەن 56 شاقىرىم جەردە ورنالاسقان جابدىقتالماعان جاعالاۋ اۋماعىندا بولعان. وقيعا تۋرالى حابار تۇسكەننەن كەيىن وقيعا ورنىنا توتەنشە جاعدايلار دەپارتامەنتىنىڭ كۇشتەرى جەدەل جەتتى.
ىزدەستىرۋ-قۇتقارۋ جۇمىستارىنا تجد قىزمەتكەرلەرى، سۇڭگۋىرلەر، ءجۇزۋ قۇرالدارى جانە ارنايى تەحنيكا جۇمىلدىرىلعان. قۇتقارۋشىلار تەڭىز اكۆاتورياسى مەن جاعالاۋ سىزىعىن ءجىتى تەكسەرىپ، جوعالعان ازاماتتى ىزدەۋدى جالعاستىرىپ جاتىر.
ماڭعىستاۋ وبلىستىق تجد تۇرعىندار مەن تۋريستەرگە جابدىقتالماعان جەرلەردە شومىلۋ ومىرگە ۇلكەن قاۋىپ توندىرەتىنىن ەسكەرتتى. ماماندار دەمالۋشىلاردى قۇتقارۋشىلار كەزەكشىلىك ەتەتىن جانە قاۋىپسىزدىك تالاپتارى ساقتالعان رەسمي جاعاجايلاردا عانا شومىلۋعا شاقىردى.
