كاسپي تەڭىزىنىڭ دەڭگەيى ايتارلىقتاي تومەندەپ، جاعالاۋداعى ەكولوگيالىق جاعداي ۋشىعىپ كەلەدى. ساراپشىلار مەن ەكولوگتار بۇل ءۇردىس ايماقتىڭ بيولوگيالىق تەپە-تەڭدىگىنە، كليماتقا جانە ەكونوميكاعا كەرى اسەر ەتۋى مۇمكىن ەكەنىن ەسكەرتۋدە. وسى ماسەلەگە بايلانىستى ءماجىلىس دەپۋتاتى جارقىنبەك امانتاي ءوز پىكىرىن ءبىلدىردى، دەپ حابارلايدى «ادىرنا» ءتىلشىسى.
«بۇل - وتە كۇردەلى ماسەلە. جالپى بۇل ماسەلەلەردى ەڭ العاشقىلاردىڭ ءبىرى بولىپ ءبىزدىڭ پرەزيدەنت كوتەرگەن. بۇل — بەس مەملەكەتتىڭ ورتاسىندا ورنالاسقان ۇلكەن تەڭىز. تەڭىزدىڭ سۋىنىڭ سوڭعى ۋاقىتتا قاتتى تومەندەپ بارا جاتقانىن ەستىپ، ءبىلىپ وتىرمىز. بۇل – ءبىزدىڭ لوگيستيكالىق الەۋەتىمىزدىڭ اقساۋىنا الىپ كەلۋى مۇمكىن. ەكىنشىدەن، تەڭىز جاعاسىنداعى ماڭعىستاۋ ءوڭىرى اۋىز سۋدى تۇششىلاندىرىپ پايدالانۋدا وسى تەڭىز سۋىنا تىكەلەي تاۋەلدى. سوندىقتان كاسپي تەڭىزىن ساقتاپ قالۋ تەك عالامدىق ەكوجۇيە ءۇشىن ەمەس، ەلىمىزدىڭ اۋىز سۋمەن قامتاماسىز ەتىلۋىنە دە تىكەلەي قاتىستى",- دەيدى دەپۋتات.
جارقىنبەك امانتايدىڭ ايتۋىنشا، سوندايدا سۋدى ۇنەمدەۋ تاسىلىنە كوشكەن ۇتىمدى. مەملەكەتتەر اراسىندا وسى ماسەلەگە ءجىتى كوڭىل ءبولىنىپ، ارنايى ءىس-شارالار قابىلدانۋى قاجەت.
"بالكىم، وزەن ارنالارىن بۇرىپ، كوكتەمگى تاسقىن سۋدى سول جاققا باعىتتاۋ كەرەك شىعار. مۇمكىن، سونداي قادامدار جاسالۋى ءتيىس دەپ ويلايمىن»، – دەدى جارقىنبەك امانتاي.
