الماتىدا سۋ ۇنەمدەۋ تالاپتارىن ورىنداماعان كولىك جۋ ورىندارىنىڭ قىزمەتى ۋاقىتشا توقتاتىلدى، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
قولدانىلعان سۋدى قايتا پايدالانۋعا ارنالعان قۇرىلعى ورناتپاعان كاسىپكەرلەرگە «الماتى سۋ» مەكەمەسى اۋىز سۋدى بەرۋدى دوعارىپ، قالا بويىنشا 40-قا جۋىق نىسان جابىلعان.
قالادا 500-دەن استام كولىك جۋ بەكەتى جۇمىس ىستەيدى. سۋ كودەكسىنىڭ تالاپتارى كۇشەيگەننەن كەيىن اۋىز سۋدى پايدالاناتىن كاسىپكەرلەرگە كىر سۋدى تازالاپ، قايتا قولدانۋعا مۇمكىندىك بەرەتىن ارنايى جۇيە ورناتۋ مىندەتتەلگەن. الايدا ەرەجەنى ساقتاماعان نىساندارعا قاتاڭ شارالار قولدانىلىپ، سۋ بەرۋ ۋاقىتشا توقتاتىلعان.
كولىك جۋ ورىندارىنىڭ قىزمەتكەرلەرى جاڭا تالاپتىڭ قارجىلىق شىعىنى جوعارى ەكەنىن ايتىپ وتىر. دەسە دە كاسىبىن ساقتاپ قالۋ ءۇشىن كوپشىلىگى سۋ تازارتۋ قوندىرعىلارىن ورناتا باستاعان.
جاڭا جۇيە ارقىلى قولدانىلعان سۋ بىرنەشە كەزەڭنەن ءوتىپ تازارتىلادى. الدىمەن كىر سۋ قازاندىقتا اۋىر قالدىقتاردان ارىلتىلادى، كەيىن سۇزگىلەردەن ءوتىپ، ارنايى بوشكەگە جينالادى. ودان سوڭ سۋعا حيميالىق قوسپالار قوسىلىپ، قايتا پايدالانۋعا جىبەرىلەدى. كاسىپكەرلەر بۇل قوسپالاردىڭ كولىككە زيانى جوق ەكەنىن ايتادى. دەگەنمەن قىزمەت باعاسىنىڭ ءوسۋى مۇمكىن ەكەنىن جوققا شىعارمايدى.
«الماتى سۋ» مەكەمەسىنىڭ مالىمەتىنشە، 500-دەن استام كاسىپكەرگە ەسكەرتۋ بەرىلىپ، تالاپتى ورىنداۋعا ۋاقىت قاراستىرىلعان. الايدا بۇگىنگى كۇنگە دەيىن قۇرىلعى ورناتپاعان 40-قا جۋىق نىسان ءالى دە سۋسىز وتىر.
