Almatyda su ünemdeu talaptaryn oryndamaǧan kölık juu oryndarynyŋ qyzmetı uaqytşa toqtatyldy, dep habarlaidy "Adyrna" ūlttyq portaly İnformbiuroǧa sıltep.
Qoldanylǧan sudy qaita paidalanuǧa arnalǧan qūrylǧy ornatpaǧan käsıpkerlerge «Almaty Su» mekemesı auyz sudy berudı doǧaryp, qala boiynşa 40-qa juyq nysan jabylǧan.
Qalada 500-den astam kölık juu beketı jūmys ısteidı. Su kodeksınıŋ talaptary küşeigennen keiın auyz sudy paidalanatyn käsıpkerlerge kır sudy tazalap, qaita qoldanuǧa mümkındık beretın arnaiy jüie ornatu mındettelgen. Alaida erejenı saqtamaǧan nysandarǧa qataŋ şaralar qoldanylyp, su beru uaqytşa toqtatylǧan.
Kölık juu oryndarynyŋ qyzmetkerlerı jaŋa talaptyŋ qarjylyq şyǧyny joǧary ekenın aityp otyr. Dese de käsıbın saqtap qalu üşın köpşılıgı su tazartu qondyrǧylaryn ornata bastaǧan.
Jaŋa jüie arqyly qoldanylǧan su bırneşe kezeŋnen ötıp tazartylady. Aldymen kır su qazandyqta auyr qaldyqtardan aryltylady, keiın süzgılerden ötıp, arnaiy böşkege jinalady. Odan soŋ suǧa himiialyq qospalar qosylyp, qaita paidalanuǧa jıberıledı. Käsıpkerler būl qospalardyŋ kölıkke ziiany joq ekenın aitady. Degenmen qyzmet baǧasynyŋ ösuı mümkın ekenın joqqa şyǧarmaidy.
«Almaty Su» mekemesınıŋ mälımetınşe, 500-den astam käsıpkerge eskertu berılıp, talapty oryndauǧa uaqyt qarastyrylǧan. Alaida bügıngı künge deiın qūrylǧy ornatpaǧan 40-qa juyq nysan älı de susyz otyr.
