ۇلىبريتانيانىڭ سىرتقى ىستەر ءمينيسترى دەۆيد كەمەرون ورتالىق ازيا (وا) ەلدەرى ۇكىمەتتەرىنىڭ وكىلدەرىمەن كەلىسسوزدەر بارىسىندا ءسوز قوزعايتىن باسىم تاقىرىپتاردى اتادى. ديپلومات ءۇش سالاعا نازار اۋداراتىنىن ايتتى، دەپ حابارلايدى "ادىرنا" ۇلتتىق پورتالى The Independent سايتىنا سىلتەمە جاساپ.
ديپلومات ءۇش سالاعا نازار اۋدارادى: جاھاندىق ءتارتىپ، ەكونوميكا جانە ءبىلىم. بىرىككەن كورولدىكتىڭ بۇرىنعى پرەمەر-ءمينيسترى قازىرگى الەمدە كوپتەگەن مەملەكەتتەر جالعىز ەڭسەرۋ قيىنعا سوعاتىن ماسەلەلەرمەن بەتپە-بەت كەلەتىنىن باسا ايتتى. سوندىقتان كەمەروننىڭ ورتالىق ازياعا ساپارى، ەڭ الدىمەن، ۇلىبريتانيانىڭ جاڭا دەڭگەيگە كوتەرىلۋى ءتيىس ايماقتاعى ەلدەرىمەن ىنتىماقتاستىعىن نىعايتۋعا ارنالعان.
ۇلىبريتانيا سىرتقى ىستەر مينيسترلىگىنىڭ باسشىسى ەڭ الدىمەن جاھاندىق ءتارتىپ تاقىرىبىن كوتەرۋدى كوزدەپ وتىر. ونىڭ ايتۋىنشا، ەگەمەندىك پەن اۋماقتىق تۇتاستىق سىندى قاعيداتتارعا قاۋىپ توندىرمەيتىندەي تىعىز ارىپتەستىك ورناتقان ءجون.
كەمەرون باسقاراتىن دەپارتامەنتتىڭ ءباسپاسوز حابارلاماسىندا ايتىلعانداي، لوندون وسى ماقساتتارعا 50 ميلليون فۋنت ستەرلينگ بولەدى. ساياساتكەر سونىمەن قاتار سىبايلاس جەمقورلىقپەن كۇرەسۋ قاجەتتىگىن اتاپ ءوتتى.
قاۋىپسىزدىك ماسەلەلەرىنە بولەك نازار اۋدارۋ كەرەك. كەمەروننىڭ ايتۋىنشا، بۇل لاڭكەستىك توپتارعا، اتاپ ايتقاندا، جاقىندا رەسەيدەگى لاڭكەستىك ارەكەتىن ۇلىبريتانيا قاتاڭ ايىپتاعان دايش-حوراسان توبىنا ءتيىمدى قارسى تۇرۋعا مۇمكىندىك بەرەدى.
ساپار بارىسىندا تاراپتار ەكونوميكالىق بايلانىستاردى دامىتۋ ماسەلەلەرىن ەگجەي-تەگجەيلى تالقىلايدى. كەمەرون شاعىن جانە ورتا بيزنەس ءۇشىن ورتالىق ازياداعى العاشقى تىكەلەي ينۆەستيتسيا قورىن (ۆەنچۋرلىق كاپيتال) قۇرۋ تۋرالى حابارلادى. بۇل قۇرىلىم ۇلىبريتانيا فيرمالارىنا ايماقتاعى كومپانيالاردى قولداۋعا كومەكتەسۋ ءۇشىن جاسالعان.
كەمەرون تابىستى سەرىكتەستىكتىڭ ەكى مىسالىن كەلتىردى. ونىڭ ايتۋىنشا، ۋەلستىڭ Concrete Canvas كومپانياسى بىشكەكتە بەتون شىعاراتىن زاۋىت اشۋدا. ونىمدەر جاڭا تەحنولوگيا بويىنشا وندىرىلەتىن بولادى، بۇل ولاردىڭ قۇنىن تومەندەتەدى جانە پروتسەسكە جۇمسالاتىن رەسۋرستاردى، مىسالى، سۋدى ۇنەمدەيدى. سونداي-اق، «استانا» حالىقارالىق قارجى ورتالىعىنىڭ جۇمىسى اتاپ ءوتىلدى، ول جالپى سوت جۇيەسىن تاجىريبەگە ەنگىزە وتىرىپ، ەكى مىڭنان استام داۋدى، سونىڭ ىشىندە ينۆەستيتسيا سالاسىنداعى كەلىسپەۋشىلىكتەردى شەشە الدى.
سوڭىندا مينيستر ءبىلىم سالاسىنداعى ىنتىماقتاستىققا توقتالدى. ونىڭ ايتۋىنشا، ۇلىبريتانيا ورتالىق ازياداعى Chevening ستيپەندياسىن قارجىلاندىرۋدى ەكى ەسەگە ارتتىرىپ، ەلدەگى ۇزدىك جوو-دا كوبىرەك ادام وقي الاتىن مۇمكىندىككە ۇمتىلىپ جاتقانىن اتادى.
