اقش پەن ۇلىبريتانيا يەمەننىڭ سولتۇستىگىندە بيلىك ەتەتىن «انسار اللاح» قوزعالىسىنىڭ (حۋسيتتەردىڭ) اسكەري نىساندارىنا سوققى جاسادى، دەپ حابارلايدى «ادىرنا» ءتىلشىسى Reuters-كە سىلتەمە جاساپ.
«اقش پەن ۇلىبريتانيا قوزعالىستىڭ قىزىل تەڭىزدەگى كەمەلەرگە شابۋىلىنا جاۋاپ رەتىندە يەمەندەگى حۋسيتتەردىڭ اسكەري نىساندارىنا اۋەدەن جانە تەڭىزدەن سوققى بەردى»،- دەلىنگەن حابارلامادا.
ونىڭ سالدارىنان سانا حالىقارالىق اۋەجايى امەريكاندىق-بريتاندىق كواليتسيانىڭ جاپپاي بومبالاۋىنا ۇشىرادى. بۇدان بولەك ەل-حودەيدا، ساادا جانە دامار پروۆينتسيالارىنا دا شابۋىل جاسالدى.
حۋسيتتەر توبىنىڭ باسشىسى ابدۋلكادەر ءال-مورتادا بۇل جاعدايعا قاتىستى مالىمدەمە جاسادى.
«امەريكالىقتار مەن بريتاندىقتاردىڭ قوقان-لوققىسى ءبىزدى قورقىتقان جوق. ءتىپتى قورقىتپايدى دا. بولىپ جاتقان جاعداي ءبىزدى گازاداعى باۋىرلارىمىزدى قولداۋ مىندەتىمىزدەن باس تارتۋعا ماجبۇرلەمەيدى»،—دەدى ول.
ايتا كەتەيىك، يەمەننىڭ باسىم بولىگىن باسىپ العان حۋسيتتەر حاماس-قا (كەيبىر ەلدە تەرروريستىك ۇيىم دەپ تانىلعان — رەد.) قولداۋ كورسەتۋ ءۇشىن ايماقتاعى كەمە جولدارىنا شابۋىل جاساعان ەدى. ولاردىڭ ارەكەتى ەۋروپا مەن ازيا اراسىنداعى ماڭىزدى ساۋدا باعىتتارىن بۇزىپ، ءتۇرلى كەمە كومپانيالارىنىڭ ايماقتاعى جۇمىسىنىڭ توقتاۋىنا سەبەپ بولدى.
