اقتوبە وبلىسىندا قاتتى جەل سالدارىنان اۋىل مەكتەبىنىڭ شاتىرى وپىرىلىپ كەتتى. بۇل تۋرالى جەلىدە بەينەجازبا تارادى، دەپ حابارلايدى "ادىرنا".
وقيعا العا اۋدانىنا قاراستى بەستاماق اۋىلىندا تىركەلگەن. بەيسەنبى كۇنى وڭىردە داۋىلدى جەل سوعىپ، ونىڭ ەكپىنى سەكۋندىنا 25 مەترگە دەيىن جەتكەن. تابيعاتتىڭ توسىن مىنەزىنەن مەكتەپ عيماراتىنىڭ شاتىرىنا زاقىم كەلىپ، قۇرىلىمنىڭ تەڭ جارتىسى ۇشىپ كەتتى.
الەۋمەتتىك جەلىلەردە تاراعان بەينەجازبادا قاتتى جەلدىڭ شاتىردى شايقاپ تۇرعانى انىق كورىنەدى. وسى جاعدايدان كەيىن توتەنشە جاعدايلار قىزمەتىنىڭ ماماندارى وقيعا ورنىنا جەدەل جەتىپ، زالالدى تىركەدى. العا اۋدانىنىڭ اكىمى اسلانبەك شۇيىنشاليەۆتىڭ ايتۋىنشا، اپات بولعان كۇنى وقۋشىلار قاۋىپسىزدىك ماقساتىندا ونلاين فورماتتا ءبىلىم العان.
«بەيسەنبى كۇنى قاتتى جەل بولدى. سول كۇنى جەلدىڭ جىلدامدىعى سەكۋندىنا 25 مەترگە دەيىن جەتتى. مەكتەپ شاتىرىنىڭ ءبىر جاق بولىگى ۇشىپ كەتتى. ول كۇنى بالالار ونلاين وقىدى. قازىرگى كەزدە قاجەتتى قۇرىلىس ماتەريالدارى جەتكىزىلدى، قالپىنا كەلتىرۋ جۇمىسى باستالدى. جۇمىس ءبىر اپتادا اياقتالادى، وقۋ پروتسەسىنە كەدەرگى كەلتىرمەيدى»، — دەدى اۋدان اكىمى.
ايتا كەتەيىك، بەستاماق ورتا مەكتەبى 1970 جىلدارى سالىنعان. 2023 جىلى بۇل ءبىلىم ۇياسى وبلىستاعى تىرەك مەكتەپتەردىڭ قاتارىنا ەنگىزىلگەن. سوڭعى جىلدارى وقۋ كابينەتتەرى جاڭارتىلىپ، وزگە مەكتەپتەرگە ۇلگى رەتىندە ۇسىنىلعان بولاتىن. قازىرگى تاڭدا مەكتەپ عيماراتىن قالپىنا كەلتىرۋ جۇمىستارى باقىلاۋعا الىنىپ، بالالاردىڭ قاۋىپسىزدىگى باستى نازاردا.
