11 قازاندا قازاقستاننىڭ بىرقاتار وڭىرىندە قولايسىز اۋا رايىنا بايلانىستى داۋىلدى ەسكەرتۋ جاريالاندى. «قازگيدرومەت» رمك مالىمەتىنشە، كەي ايماقتاردا تۇمان ءتۇسىپ، جەلدىڭ جىلدامدىعى سەكۋندىنا 22 مەترگە دەيىن جەتۋى مۇمكىن. سونىمەن قاتار بىرنەشە وبلىستا ءورت قاۋپى جوعارى جانە توتەنشە دەڭگەيدە ساقتالادى، دەپ حابارلايدى "ادىرنا".
سينوپتيكتەردىڭ بولجامى بويىنشا، تۇنگى جانە تاڭعى ۋاقىتتا اباي، اقتوبە، اتىراۋ، اقمولا، شىعىس قازاقستان، جامبىل، باتىس قازاقستان، قاراعاندى، قوستاناي، ماڭعىستاۋ، پاۆلودار، سولتۇستىك قازاقستان جانە ۇلىتاۋ وبلىستارىندا تۇمان كۇتىلەدى.
كۇندىز اقمولا، قوستاناي جانە سولتۇستىك قازاقستان وبلىستارىندا جەلدىڭ ەكپىنى 15-20 م/س-قا دەيىن كۇشەيۋى ىقتيمال. مۇنداي جەل جامبىل جانە تۇركىستان وبلىستارىنىڭ تاۋلى ايماقتارىندا دا بولجانىپ وتىر.
جەتىسۋ وبلىسىنداعى الاكول كولدەرى ماڭىندا سولتۇستىك-شىعىس باعىتتاعى جەلدىڭ جىلدامدىعى كۇندىز 17-22 م/س-قا دەيىن جەتۋى مۇمكىن.
بۇدان بولەك، اقتوبە، اتىراۋ، جەتىسۋ، باتىس قازاقستان، قوستاناي جانە ماڭعىستاۋ وبلىستارىنىڭ كەيبىر اۋماقتارىندا جوعارى ءورت قاۋپى ساقتالادى. ال اقتوبە وبلىسىنىڭ باتىسى، وڭتۇستىگى مەن ورتالىعىندا، سونداي-اق ۇلىتاۋ وبلىسىنىڭ وسى بولىكتەرىندە توتەنشە ءورت قاۋپى بولجانىپ وتىر.
ماماندار تۇرعىندارعا اۋا رايىنىڭ وزگەرىستەرىن ەسكەرىپ، ساقتىق شارالارىن ۇستانۋعا كەڭەس بەرەدى.
