"پۋتينگە جولدايمىن": ورىس سىنىبىن اشتىرماق بولعان ءبىر توپ قازاق ەلدى پۋتينمەن قورقىتتى

3054

نۇر-سۇلتان قالاسىنداعى №93-مەكتەبىنىڭ ءبىر توپ اتا-اناسى مەكتەپتەن ورىس تىلىندە وقىتاتىن ارالاس سىنىپ اشۋعا قاتىستى ماسەلە كوتەردى، دەپ حابارلايدى "ادىرنا" سايتى. اتالعان ماسەلەگە بايلانىستى مەكتەپ باسشىلىعى اشىق جيىن وتكىزگەن.

جيىنعا ءماجىلىس دەپۋتاتى قازىبەك يسا، جاناربەك ءاشىمجان، امانجول ءالتاي، ماقپال مىسا جانە اقىن داۋلەتكەرەي كاپۇلى، قازاق ءتىل قوعامىنىڭ مۇشەسى سەرىك ەرعالي، حيميا عىلىمدارى بويىنشا PhD دوكتورانت، نۇر-سۇلتان قالاسىندا №90 مەكتەپ-گيمنازيانىڭ ديرەكتورى اياتجان احمەتجانۇلى دا قاتىسقان.

جيىن بارىسىندا ەكى جاق ءبىراز ءبىر توقتامعا كەلە الماعانىمەن ناتيجەسىندە مامىلەگە كەلدى. الايدا جيىن سوڭىندا ءبىر اتا-انا جيىندى تولىق ۆيدوەعا ءتۇسىرىپ العانىن جانە ونى رەسەي پرەزيدەنتى پۋتينگە جولدايتىنىن ايتىپ قورقىتقان.

بۇل تۋرالى اياتجان احمەتجانۇلى ءوزىنىڭ Facebook پاراقشاسىندا بىلاي دەپ جازدى:

«بۇگىن ءبىر مەكتەپتى قازاق ەتىپ ساقتاپ قالۋ ءۇشىن جينالىس بولدى. ءماجىلىس دەپۋتاتتارى قاتىستى.بۇندايعا ىسىلدىق قوي، زاڭدىق تۇرعىدا ءبىراز اتا-انالاردى ورنىنا قويدىق. ءتىل جاناشىرلارى ءبىراز لەكتسيا وقىدى. قىرعىن داۋ بولدى. ءالىم كەلگەنشە بالا قۇقىعى بۇزىلمايتىنىن زاڭ بويىنشا ءتۇسىندىرىپ، باسقا مەكتەپكە باراتىنىن ايتتىم. بۇل مەكتەپ تازا قازاق بوپ قالادى دەپ كەسىمدى ءسوز ايتتىم. ء(بىر رەسمي مەن شەشەتىندەي). ەڭ وكىنىشتىسى ورىس سىنىبىن تالاپ ەتىپ وتىرعان كىلەڭ قازاق. سول قازاقتىڭ ءبىرى جينالىستان شىققاسىن ەسىك الدىندا تۇرىپ، بۇگىنگى سويلەگەن سوزدەردىڭ ءبارىن ءتۇسىرىپ الدىم. تولىق ۆيدەو جاسادىم. رەسەيگە، پۋتينگە تىكە جىبەرەم دەيدى. (قازاق ايەل). دەپۋتاتتارىمىزدىڭ كوزىن باقىرايتىپ قويىپ، پۋتينمەن قورقىتتى. باراتىن جەرىڭە بار دەدىم كۇيىپ كەتىپ... نە دەيىن...».

«ماسقارا! مەن ونى ايتقان كەزدە مۇعالىمدەر بولمەسىندە جۇرتپەن سويلەسىپ تۇرعان ەدىم، كەيىن ەسىتتىم. سۇمدىق قوي! قۇل عوي ناعىز، قوجايىنىن پۋتين ساناعان! مىنە، ءبىزدىڭ بيلىكتىڭ 30 جىلدا ءبىر ۇلتتى ەكى تىلگە - ەكىگە بولگەن قاستاندىعى!» دەيدى ءماجىلىس دەپۋتاتى قازىبەك يسا.

بۇل ماسەلە قوعامدا قىزۋ تالقىنىڭ استىندا قالدى. وسىعان بايلانىستى بەلسەندىلەر ءتۇرلى پىكىر بىلدىرۋدە. قازاق ءتىلى قوعامىنىڭ مۇشەسى سەرىك ەرعالي بىلاي دەپ جازدى:

– ءتىل ماسەلەسى مايدانعا اينالىپ بارادى... جاسىراتىنى جوق. بۇگىن عانا استانالىق جاڭا اشىلعالى وتىرعان 93-مەكتەپتىڭ تاعدىرى كوكپارعا ءتۇستى. ونشاقتى قازاق كەلىنشەگى كەلىپ، وزدەرىنىڭ قۇقىقتارىن العا سالىپ، ورىس سىنىبىن اشۋدى تالاپ ەتتى. بۇل جايتتى الدىن الا ەستىگەن زيالى قاۋىم، ءبىر توپ ماجىلىسمەن جانە قالالىق شەندىلەر، ءتىل جاناشىرلارى بىرىگىپ، ىرىتكىگە قارسى تۇرۋعا تۋرا كەلدى. الگى ونشاقتى كەلىنشەك قازاقشا جاقسى تۇسىنەدى، جارتىسى سويلەيدى، بىراق بالالارىن ورىس سىنىبىنا بەرۋگە بارىن سالدى. ورتاسىندا ءبىر جىگىت بار. بايقاعانىم جانە ءبىر كەلىنشەكتىڭ ايتۋىنشا، كۇيەۋى وفيتسەر ەكەن، سوعان قاراعاندا بارلىعى دا قازاق اسكەرىنىڭ قىزمەتشىلەرى سەكىلدى.  كەزەك پە كەزەك سويلەپ ارىندارىن باسقانداي بولدىق. اسىرەسە اياتجان احمەتجانۇلىنىڭ ءسوزى ناقتى ءارى شەشىمگە تولى بولدى: زاڭ بويىنشا راديۋسى 2 شاقىرىمعا دەيىنگى ماڭايداعى كەز كەلگەن مەكتەپ تاڭداي بەرۋگە بولادى ەكەن. سوتتا بۇل جاعىنان جەڭە المايسىڭدار دەپ اياتجان ماڭدايعا ۇرعانداي ەتىپ ايتتى. ال بۇلار جاڭادان سالىنعان براۆو تۇرعىن ءۇي كەشەنىنىڭ جانىنداعى 1200 ورىندىق مەكتەپتى يەلەنگىسى كەلەدى. ءۇي ىشىنەن ءۇي تىككىسى كەلەدى. ءتورت كەلىنشەكتىڭ ەسىمدەرى - كادىمگى ءجاميلا، سامال، ايگەرىم، شولپان! رۋلارى – ۋاق، قىپشاق، ارعىن، بىرەۋى رۋىن بىلمەيدى – رەسەيلىكپىن دەيدى. بۇلار – ءبىزدىڭ سوڭعى 30 جىلدىق تاۋەلسىزدىك ءداۋىرىنىڭ ۇرپاعى. بۇلاردى كىنالاۋعا بولا ما؟! مەنىڭشە جوق. ولارعا ءبىر سۇراق قويىپ، ءۇش ارگۋمەنت ايتۋلارىن سۇرادىم: نەلىكتەن بالاسىن ورىسشا وقىتپاق؟ بۇگىنگى بۇل وقيعا، پارلامەنتتە مايشاممەن قاراۋعا تۇراتىن ماسەلە بارىن اڭعارتتى!

 

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket