تارازداعى جويقىن جەلدىڭ سالدارى بەلگىلى بولدى، دەپ حابارلادى قالا اكىمدىگىنىڭ ءباسپاسوز قىزمەتى.
"قالا بويىنشا 10 كوپقاباتتى تۇرعىن ءۇيدىڭ 1 405 شارشى مەتر شاتىرى زاقىمدالدى. شاتىرلاردى قالپىنا كەلتىرۋ جۇمىستارى مەردىگەرلەر تاراپىنان جەدەل ىسكە اسىرىلاتىن بولادى. سونداي-اق، 15 مولتەك اۋدانى №14 ءۇيدىڭ 20 شارشى مەتر بالكونى جانە 3 مەتر گاز قۇبىرىنا زالال كەلتىرىلدى. قالا كوشەلەرىندە 3 ەلەكتر باعاناسى قۇلادى", - دەپ حابارلادى قالا اكىمىنىڭ ءباسپاسوز قىزمەتى.
اكىمدىكتە اتاپ وتكەندەي، قازىرگى ۋاقىتتا "تاراز جارىق" جشس-نىڭ 3 بريگاداسى باعانالاردى قالپىنا كەلتىرىپ قويعان.
"4 كوشەدە 6 جەردەن ەلەكتر جەلىلەرى ءۇزىلىپ، "تاراز قالالىق ەلەكتر جۇيەلەرى" مەكەمەسى تاراپىنان جوندەۋ جۇمىستارى جۇرگىزىلدى. سونداي-اق، ەلەكتر جارىعىنىڭ وشۋىنە بايلانىستى، ديسپەتچەرلىك قىزمەتكە 5 ءوتىنىش ءتۇسىپ، بۇل جۇمىستار جەدەل بريگادالار تاراپىنان ىسكە قوسىلدى", - دەدى جەرگىلىكتى بيلىك وكىلى.
داۋىل باستالعان ۋاقىت ىشىندە قالا كوشەلەرىندەگى 20 باعدارشام ىستەن شىقتى. ونى قالپىنا كەلتىرۋ جۇمىستارى بويىنشا جۇمىستار اتقارىلۋدا.
