Qazaqstanda mobildı internet pen ūialy bailanys qyzmetterınıŋ baǧasyn tömendetudı sūrap, petisiia jariialady, dep habarlaidy "Adyrna" ūlttyq portaly.
Petisiia GosRating.com platformasynda jariialanǧan. Qūjat avtory retınde Osmae Asanov esımdı azamat körsetılgen. Ötınış Bäsekelestıktı qorǧau jäne damytu agenttıgıne, sondai-aq Sifrlyq damu, innovasiialar jäne aeroǧaryş önerkäsıbı ministrlıgıne joldanǧan.
Petisiia avtorlary ūialy bailanys operatorlarynyŋ qazırgı tariftık saiasatyn negızsız dep baǧalaidy. Olardyŋ aituynşa, operatorlar jabdyq satyp alu şyǧyndary men salyqtyq auyrtpalyqty, sonyŋ ışınde qosylǧan qūn salyǧynyŋ ösuın alǧa tartyp, tarifterdı jyl saiyn köterıp keledı. Alaida bailanys sapasynyŋ aitarlyqtai jaqsaruy baiqalmaidy.
«Naryqtyq özın-özı retteu öz tiımdılıgın körsete almady. Şynaiy bäsekenıŋ bolmauy operatorlardyŋ bır mezgılde äreket etuıne äkelıp otyr. Barlyq operatorlarda baǧanyŋ qatar ösuı tūtynuşylardy taŋdau mümkındıgınen aiyryp, tarifter boiynşa jasyryn kelısım bar ekenın körsetedı», – delıngen petisiia mätınınde.
Sondai-aq avtorlar memlekettık qyzmetter, onlain-banking pen bılım beru salasynyŋ keŋınen sifrlandyryluyn eskere otyryp, internetke qol jetkızu artyqşylyq emes, negızgı qajettılık ekenın atap ötken. Osyǧan bailanysty memleket azamattardy jeke kompaniialardyŋ negızsız baǧa ösıruınen qorǧauǧa mındettı dep sanaidy.
Petisiiada qoldanystaǧy tarifterdı qyzmet sapasy men halyqtyŋ satyp alu qabıletıne sai deŋgeige deiın tömendetu, ūialy bailanys pen internettı äleumettık maŋyzy bar qyzmet retınde tanu, Qazaqstan men basqa elderdegı bailanys baǧalaryna resmi salystyrmaly taldau jürgızu talaptary körsetılgen.
