شىمكەنت قالاسىنىڭ كاسىپكەرى باقىت قالمەن بىرنەشە جىلدان بەرى ءوزىن ۇيىمداسقان قىلمىستىق توپتىڭ قىسىمىنا ۇشىراعانىن ايتىپ، قۇقىق قورعاۋ ورگاندارىنان ادىلدىك تابا الماي جۇرگەنىن مالىمدەدى.
ونىڭ ايتۋىنشا، قىلمىستىق ارەكەتتەر سالدارىنان ول 33 ميلليون تەڭگەدەن، اۆتوكولىگىنەن جانە ءنۇرسات شاعىن اۋدانىنداعى ەكى بولمەلى پاتەرىنەن ايىرىلعان.
كاسىپكەردىڭ سوزىنشە، وقيعا 2023 جىلى شۋ اۋدانىندا مەملەكەتتىك تەندەر اياسىنداعى جۇمىستى ورىنداۋ كەزىندە باستالعان. جانار-جاعارماي تاپشىلىعىنا بايلانىستى ول تانىسى، كاسىپكەر ءتاجىحان ەرنازاروۆتان قارجىلاي كومەك سۇراعان. كەيىنىرەك ەرنازاروۆتىڭ اتىنان كەلگەن ەرزاح تۋرەگەلديەۆ ءوزىن 23 ميلليون تەڭگە قارىزسىڭ دەپ قورقىتىپ، بوپسالاي باستاعان.
باقىت قالمەننىڭ ايتۋىنشا، جۇمىس ءۇشىن تولەم تۇسەر كۇنى تورەحالي ابدازيموۆ ەسىمدى ازامات ارالاسىپ، «كومەكتەسەمىن، قورعان بولامىن» دەگەن ۋادەمەن سەنىمگە كىرگەن. الايدا ءدال سول كۇنى كاسىپكەردى ۇرىپ-سوعىپ، ونىڭ ەسەپشوتىنا تۇسكەن 33 ميلليون تەڭگەنى جالعان قۇجاتتار ارقىلى ءۇشىنشى تۇلعانىڭ — كاسىپكەر نىشان ەرجانوۆتىڭ ەسەپشوتىنا اۋدارتقان. قالمەن سوتتا ەرجانوۆقا ەشقانداي قارىزى جوق ەكەنىن قۇجاتتارمەن دالەلدەگەنىن ايتادى، الايدا سوت بۇل ءۋاجدى نازارعا الماعان.
كەيىنىرەك، كاسىپكەردىڭ سوزىنشە، ونىڭ قىزمەتكەرىنىڭ اتىنا تىركەلگەن Ravon R3 اۆتوكولىگى دە كۇش قولدانۋ ارقىلى تارتىپ الىنعان. كولىك اۆتولومباردتا كەپىلدە تۇرعانىنا قاراماستان، ءۇشىنشى تۇلعالاردىڭ اتىنا راسىمدەلگەن.
ودان بولەك، باقىت قالمەننىڭ ايەلى اسەم قالمەننىڭ اتىنا تىركەلگەن ءنۇرسات شاعىن اۋدانىنداعى پاتەر دە قىسىم ارقىلى باسقا ادامنىڭ اتىنا جازىلعان. كاسىپكەر بۇل ارەكەتتەردىڭ بارلىعى قورقىتۋ مەن زورلىق-زومبىلىق ارقىلى جاسالعانىن العا تارتادى.
سونداي-اق، قالمەن ءوزىن بۇرىن-سوڭدى تانىمايتىن ادامداردىڭ اتىنا 400 ميلليون تەڭگە قارىزىم بار دەگەن قولحاتتاردى جازۋعا ماجبۇرلەگەنىن، ارىزدانعان جاعدايدا سول قارىزداردى موينىنا ءىلىپ قويامىز دەپ قورقىتقانىن جەتكىزدى. ونىڭ ايتۋىنشا، وزىنە جانە وتباسىنا، سونىڭ ىشىندە بالالارىنا قاتىستى قوقان-لوقى جاسالعان.
كاسىپكەر بۇل دەرەكتەر بويىنشا پوليتسياعا بىرنەشە رەت ارىزدانعان. الايدا قۇقىق قورعاۋ ورگاندارى ءىستى «قىلمىس قۇرامى جوق» دەگەن نەگىزبەن توقتاتقان. پروكۋراتۋرا مەن سوت تا كاسىپكەردىڭ شاعىمىن قاناعاتتاندىرماعان.
قازىرگى تاڭدا باقىت قالمەن ءوزىنىڭ ءومىرى مەن قاۋىپسىزدىگىنە الاڭداپ وتىرعانىن ايتىپ، سوڭعى امال رەتىندە اقوردا الدىنا بارىپ ءوزىن-ءوزى ورتەۋگە دايىن ەكەنىن مالىمدەدى.
