بورانعا بايلانىستى ەكى وبلىستا جول جابىلدى

قازاقستاننىڭ ەكى وڭىرىندە اۋا رايىنىڭ كۇرت ناشارلاۋىنا بايلانىستى رەسپۋبليكالىق ماڭىزى بار اۆتوجولدار ۋاقىتشا جابىلدى، دەپ حابارلايدى "ادىرنا". 

10 قاڭتار كۇنى ساعات 21:45-تەن باستاپ بوران مەن كوكتايعاقتىڭ كۇشەيۋىنە بايلانىستى اقتوبە جانە قىزىلوردا وبلىستارىندا جۇك كولىكتەرى مەن قوعامدىق كولىكتىڭ قوزعالىسىنا شەكتەۋ قويىلدى.

اقتوبە وبلىسىندا «رەسەي شەكاراسى – مارتوك – اقتوبە – قارابۇتاق – قىزىلوردا – شىمكەنت – تاراز – قورداي – الماتى – قورعاس – قىتاي شەكاراسى» تاسجولىنىڭ 965-1240 شاقىرىم ارالىعى، ياعني قارابۇتاق اۋىلىنان قىزىلوردا وبلىسىنىڭ شەكاراسىنا دەيىنگى بولىگى جابىلدى.

ال قىزىلوردا وبلىسىندا وسى باعىتتاعى جولدىڭ 1240-1362 شاقىرىم ارالىعى — اقتوبە وبلىسىنىڭ شەكاراسىنان ارال قالاسىنا دەيىنگى اۋماقتا كولىك قوزعالىسى ۋاقىتشا توقتاتىلدى.

«قازاۆتوجول» ۇلتتىق كومپانياسىنىڭ مالىمەتىنشە، جولداردى قايتا اشۋ 11 قاڭتار كۇنى تاڭعى ساعات 07:00-گە جوسپارلانىپ وتىر.

ماماندار جۇرگىزۋشىلەرگە اۋا رايى جاقسارعانشا الىس جولعا شىقپاۋعا، قاۋىپسىزدىك تالاپتارىن قاتاڭ ساقتاۋعا جانە رەسمي دەرەككوزدەردەن اقپاراتتى تۇراقتى قاداعالاپ وتىرۋعا كەڭەس بەرەدى.