16 ءساۋىر كۇنى اقتاۋدا «Turgundar amanaty» پارتيالىق جوباسى شەڭبەرىندە «Amanat» پارتياسىنىڭ ۇيىمداستىرۋىمەن ء«ۇيدى باسقارۋ: جاۋاپكەرشىلىك، سەنىم، ناتيجە» اتتى وڭىرلىك فورۋم ءوتتى. اۋقىمدى ءىس-شارا تۇرعىن ءۇي-كوممۋنالدىق شارۋاشىلىعى سالاسىنىڭ وزەكتى ماسەلەلەرىن تالقىلايتىن ماڭىزدى ديالوگ الاڭىنا اينالدى.
فورۋمعا ماڭعىستاۋ وبلىسىنىڭ اكىمى نۇرداۋلەت قيلىباي، قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى ەدىل جانبىرشين مەن سامات مۇساباەۆ، «Amanat» پارتياسى حاتشىسى ەرجان جىلقىباەۆ، پارتيانىڭ وبلىستىق فيليالىنىڭ توراعاسى نۇربەك قاراساەۆ، ءماسليحات دەپۋتاتتارى، مەملەكەتتىك ورگانداردىڭ وكىلدەرى، سونداي-اق مۇلىك يەلەرى بىرلەستىكتەرىنىڭ بەلسەندى مۇشەلەرى قاتىستى.
كەزدەسۋدىڭ نەگىزگى تاقىرىبى – كوپقاباتتى تۇرعىن ۇيلەردى باسقارۋ تيىمدىلىگىن ارتتىرۋ جانە تۇرعىن ءۇي-كوممۋنالدىق شارۋاشىلىعىنىڭ زاماناۋي جۇيەسىن دامىتۋ. جيىندا ينجەنەرلىك ينفراقۇرىلىمدى جاڭعىرتۋ، ورتاق مۇلىكتى كۇتىپ ۇستاۋ، كوممۋنالدىق تولەمدەردىڭ اشىقتىعى مەن ادىلدىگىن قامتاماسىز ەتۋ ماسەلەلەرى قارالدى.
سونىمەن قاتار مۇلىك يەلەرى بىرلەستىكتەرى مەن تۇرعىنداردى پراكتيكالىق تۇرعىدا قولداۋ ماسەلەسىنە ەرەكشە نازار اۋدارىلدى. «Turgundar amanaty» جوباسى اياسىندا ازاماتتاردىڭ باستامالارىن سۇيەمەلدەۋ جانە قۇقىقتىق ساۋاتتىلىعىن ارتتىرۋ كوزدەلىپ وتىر. بۇل – جاۋاپتى ءارى بەلسەندى ازاماتتىق قوعام قالىپتاستىرۋعا باعىتتالعان ماڭىزدى قادام.
فورۋم بارىسىندا «Amanat» پارتياسىنىڭ ماڭعىستاۋ وبلىستىق فيليالى مەن وڭىردەگى باسقارۋشى جانە سەرۆيستىك كومپانيالار قاۋىمداستىعى اراسىندا ىنتىماقتاستىق تۋرالى مەموراندۋمعا قول قويىلدى. بۇل قۇجات تۇرعىن ءۇي قورىن باسقارۋ ساپاسىن ارتتىرۋعا جانە ءوزارا ءىس-قيمىلدى جۇيەلى تۇردە جولعا قويۋعا مۇمكىندىك بەرەدى.
ءىس-شارا اياسىندا مۇلىك يەلەرى بىرلەستىكتەرى مەن پاتەر يەلەرى كووپەراتيۆتەرىنىڭ بەلسەندى وكىلدەرى العىس حاتتارمەن ماراپاتتالدى. سونداي-اق پارتيا قاتارىنا جاڭا مۇشەلەردى سالتاناتتى تۇردە قابىلداۋ ءراسىمى ءوتتى.
فورۋمدى قورىتىندىلاعان وبلىس اكىمى نۇرداۋلەت قيلىباي تۇرعىن ءۇي-كوممۋنالدىق سالانى دامىتۋدىڭ ستراتەگيالىق ماڭىزىن اتاپ ءوتتى.
– باستى ماقساتىمىز – تۇرعىندارعا قولايلى، قاۋىپسىز جانە ساپالى ءومىر ءسۇرۋ ورتاسىن قالىپتاستىرۋ. بۇل باعىتتا ينفراقۇرىلىمدى جاڭعىرتۋ، تسيفرلىق شەشىمدەردى ەنگىزۋ جانە قىزمەت ساپاسىن ارتتىرۋ جۇمىستارى جۇيەلى تۇردە جالعاسۋدا. تەك بىرلەسكەن ءارى جاۋاپتى جۇمىستىڭ ناتيجەسىندە ناقتى ءارى تۇراقتى جەتىستىكتەرگە قول جەتكىزۋگە بولادى، – دەدى ءوڭىر باسشىسى.
ايتا كەتەيىك، وڭىردە تۇرعىن ءۇي قورىن جاڭعىرتۋ جۇمىستارى جۇيەلى تۇردە جۇرگىزىلۋدە. 2011-2025 جىلدار ارالىعىندا 56 كوپقاباتتى تۇرعىن ۇيگە كۇردەلى جوندەۋ جۇرگىزىلدى. بيىل بۇل جۇمىستار جەرگىلىكتى بيۋدجەت ەسەبىنەن جالعاسادى.
بۇگىندە ماڭعىستاۋ وبلىسىندا 1 938 كوپقاباتتى تۇرعىن ءۇي بار، ولاردىڭ 1 076-سى كوندومينيۋم نىسانى رەتىندە تىركەلگەن. قالعان ۇيلەردى تىركەۋ جۇمىستارى قارقىندى تۇردە جالعاسۋدا.
فورۋم ساراپتامالىق پىكىرتالاستار سەرياسىمەن قورىتىندىلانىپ، قاتىسۋشىلار سالا دامۋىنىڭ پراكتيكالىق شەشىمدەرى مەن الداعى قادامدارىن تالقىلادى.
