قازاقستانداعى ەڭ اۋقاتتى ادامداردىڭ ءبىرى، ميللياردەر تيمۋر قۇلىباەۆتىڭ Halyk قورى 4 ميلليون اعاش وتىرعىزۋ ءۇشىن «Halyk ورمانى» جوباسىنا 1 ملرد تەڭگە ينۆەستيتسيا قۇيدى. جوبا ەكولوگيا مينيسترلىگىمەن بىرلەسە وتىرىپ جۇزەگە اسپاق، دەپ حابارلايدى «ادىرنا» ءتىلشىسى.
16 قىركۇيەكتە تاراپتار ىنتىماقتاستىق تۋرالى مەموراندۋمعا قول قويدى. الداعى ۋاقىتتا كوشەتتەر «سەمەي ورمانى» مەملەكەتتىك تابيعي رەزەرۆاتى, ىلە-الاتاۋ ۇلتتىق پاركى جانە ەلوردانىڭ جاسىل بەلدەۋى اۋماقتارىنا ەگىلەتىن بولادى.
ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ ايتۋىنشا، بۇل – ەلىمىزدىڭ ەكولوگيالىق قاۋىپسىزدىگى مەن تۇراقتى دامۋى جولىنداعى ستراتەگيالىق باستاما.
«63 مىڭ گەكتار جەردى الداعى 10 جىلدا تولىعىمەن قالپىنا كەلتىرەمىز دەپ ويلايمىز. وسى ءبولىنىپ جاتقان قاراجاتتى ءتيىمدى قولدانساق، بۇنىڭ تيگىزەتىن ىقپالى وسى قورشاعان ورتامىزعا وتە زور»،–دەدى ول.
«Halyk» قورى قامقورشىلىق كەڭەسىنىڭ مۇشەسى ءۇمىت شاياحمەتوۆا ەلىمىزدىڭ تابيعي بايلىعىن ساقتاۋدىڭ اسا ماڭىزدى جۇمىس ەكەنىن اتاپ ءوتتى.
«Halyk ورمانى» – بۇل ەكولوگيالىق قاۋىپسىزدىك پەن ەل بولاشاعىنا سالىنعان ينۆەستيتسيا. ءبىز مەملەكەتپەن جانە قوعاممەن كۇش بىرىكتىرىپ، ۇلت پەن بولاشاق ۇرپاقتىڭ ساۋلىعى ءۇشىن ەڭبەك ەتىپ كەلەمىز. بۇل جوبا – كەلەر ۇرپاققا قالدىراتىن ەڭ قىمبات مۇرامىزدىڭ ءبىرى. بۇل جاي عانا اعاش وتىرعىزۋ ەمەس، قازاقستان تابيعاتىن قورعاۋعا جاسالعان ماڭىزدى قادام. قوردىڭ قولداۋى مەن قوعامنىڭ بەلسەندىلىگى ارقاسىندا ەلىمىزدەگى ەكولوگيالىق جاعدايدى جاقسارتا الامىز دەپ سەنەمىن»،—دەپ پىكىر ءبىلدىردى ول.
«Halyk ورمانى» جوباسى – قوردىڭ جۇيەلى ەكولوگيالىق جۇمىسىنىڭ جالعاسى. 2025 جىلعى كوكتەمدە «GreenAct» ەكوچەللەندجى ىسكە قوسىلىپ، ازاماتتار مەن ۇيىمداردىڭ ۇزدىك ەكولوگيالىق باستامالارىن قولداۋعا باعىتتالدى. جوباعا ەلدىڭ جەتەكشى كومپانيالارى مەن بەلسەندىلەرى قاتىسىپ، ونداعان تىڭ يدەيا ۇسىندى.
بۇعان دەيىن پرەزيدەنت قاسىم-جومارت توقاەۆ ءوز جولداۋىندا: «قورشاعان ورتاعا ۇقىپتى، جاۋاپتى ءارى جاناشىرلىقپەن قاراۋ – ۇلتتىق يدەولوگيامىزدىڭ اجىراماس بولىگىنە اينالۋى ءتيىس», – دەگەن بولاتىن.
«Halyk ورمانى» باستاماسى مەملەكەت باسشىسى بەلگىلەگەن وسى مىندەتتەردى جۇزەگە اسىرىپ، «تaza Qazaqstan» ۇلتتىق تۇجىرىمداماسىنا ۇلەس قوسپاق.
باعدارلامانىڭ نەگىزگى مىندەتتەرى:
– ەكولوگيالىق تۇرعىدان وسال ايماقتاردا جاڭا ورمان القاپتارىن قۇرۋ،
– ورتتەن زارداپ شەككەن اۋماقتاردى قالپىنا كەلتىرۋ،
– بيوالۋانتۇرلىكتى ساقتاۋ جانە ەكولوگيالىق تەپە-تەڭدىكتى قولداۋ.
بۇل باستاما 2023 جىلعى ماۋسىمدا «سەمەي ورمانى» رەزەرۆاتىندا بولعان الاپات ورتتەن كەيىن ايرىقشا وزەكتى بولىپ وتىر. ول كەزدە 60 مىڭ گەكتاردان استام ورمان جانىپ كەتكەن ەدى.
جوبا شەڭبەرىندە حالىقارالىق جانە قوعامدىق ۇيىمدارمەن ارىپتەستىك ورناتىلماق.
