Qazaqstannyŋ eks-prezidentı Nūrsūltan Nazarbaevtyŋ küieubalasy, käsıpker Timur Qūlybaev Ūlybritaniia hanzadasy Endriuden zäulım üidı 15 million funt sterlingke satyp alǧan. Būl sūralǧan baǧadan 3 million funtqa qymbat. BBC zertteuınde mämıle üşın tölengen qarajattyŋ bır bölıgı būryn halyqaralyq jemqorlyq janjalynda atalǧan ofşorlyq kompaniia arqyly ötkendıgı aitylǧan, dep habarlaidy "Adyrna" ūlttyq portaly.
BBC deregınşe, saraidy satyp alu üşın jūmsalǧan qarajattyŋ bır bölıgı Enviro Pacific Investments kompaniiasy ūsynǧan nesie arqyly jabylǧan. Keiın İtaliia prokuraturasy atalǧan kompaniianyŋ qarjysy paraqorlyq shemalary arqyly alynǧan boluy mümkın degen tūjyrym jasaǧan.
İtaliialyq tergeu materialdarynda Enviro Pacific kompaniiasyna qarajat Aventall atty qūrylym arqyly tüskenı körsetıledı. Būl kompaniiany italiialyq käsıpker Agostino Bianki men «deldal» retınde tanylǧan Massimo Guidotti basqarǧan. Tergeu barysynda Bianki sotta Qūlybaev pen basqa da qazaqstandyq şeneunıkterge mūnai kelısımşarttary üşın para bergenın moiyndaǧan.
«2007 jyly jyljymaityn mülıkke qatysty mämıle Unity Assets Corporation ofşory arqyly räsımdeldı. Qūjat jüzınde ol Qūlybaevqa tiesılı bolǧan. Satyp aluşynyŋ esımın Bukingem saraiy da, Endriudıŋ özı de jariialamady. Būl onyŋ memlekettık qyzmetker märtebesıne jäne sol kezdegı Qazaqstan prezidentı Nūrsūltan Nazarbaevpen tuystyq bailanysyna qaramastan jasaldy», - delıngen jariialanymda.
BBC saualnama jürgızgen zaŋgerler «qyzyl jalauşalarǧa» nazar audarǧan. Olardyŋ qatarynda ofşorlyq shemalar, qarjylandyru közderınıŋ aşyq emestıgı, satyp alu baǧasynyŋ tym joǧary boluy jäne aqşany jylystatu belgılerı bar. Al Qūlybaevtyŋ advokattary ol nesienı paiyzymen tolyq ötegenın, zaŋ būzbaǧanyn jäne eşbır tergeuge qatysy bolmaǧanyn mälımdedı.
Qūlybaev satyp alǧan Sunninghill Park zäulım üiı ūzaq uaqyt bos tūrǧan, keiın mülde būzylǧan. Onyŋ ornyna jaŋa üi salynǧanymen, ol da paidalanylmaǧan.
Aita ketsek, Qūlybaevtqa zäulım üiın satqan hanzada Endriu jaqynda barlyq koroldık ataqtarynan aiyrylyp, resmi rezidensiiadan kettı. Būl onyŋ Djeffri Epşteinmen bailanysyna jäne seksualdyq qysym körsetu aiyptaryna qatysty daudan keiın boldy. Korol Charlz III bauyryn rezidensiiadan şyǧaru turaly şeşımdı özı qabyldap, ony barlyq saltanatty mındetterden şettettı.
