الماتىلىق «قايرات» پەن قازاقستان قۇراماسىنىڭ نامىسىن قورعاپ جۇرگەن، لوندوننىڭ «چەلسي» كلۋبىندا وينايتىن 16 جاستاعى شابۋىلشى داستان ساتپاەۆ ورتالىق ازياداعى بەس ەلدىڭ چەمپيوناتتارىندا وينايتىن ەڭ قىمبات فۋتبولشى اتاندى، دەپ حابارلايدى "ادىرنا" ۇلتتىق پورتالى.
Transfermarkt پورتالىنىڭ سوڭعى دەرەكتەرى بويىنشا، ساتپاەۆتىڭ نارىقتاعى باعاسى 500 مىڭ ەۋرودان 1,8 ميلليون ەۋروعا دەيىن وسكەن. بۇل – ونىڭ نەبارى 16 جاسىندا قازاقستان چەمپيوناتىنىڭ ەڭ ۇزدىك سۇرمەرگەنى اتانىپ، ۇلتتىق قۇرامادا دەبيۋت جاساۋىنىڭ ناتيجەسى.
بۇعان دەيىن ايماقتاعى ەڭ قىمبات فۋتبولشى - وزبەكستاندىق «ناساف» كومانداسىنىڭ قاقپاشىسى ابدۋۆوحيد نەماتوۆ بولعان ەدى (1,5 ملن ەۋرو). جۋىردا ونى وسى كلۋبتىڭ تاعى ءبىر ويىنشىسى اكمال موزگوۆوي قۋىپ جەتىپ، باعاسى 1,2 ملن ەۋرودان 1,5 ملن ەۋروعا دەيىن ءوستى. قازىر جاڭا كوشباسشى – داستان ساتپاەۆ.
تاجىكستان چەمپيوناتىندا ەڭ قىمبات فۋتبولشى - «يستيكلول» كومانداسىنىڭ جارتىلاي قورعاۋشىسى اليشەر دجاليلوۆ (500 مىڭ ەۋرو).
قىرعىزستاندا ەڭ جوعارى باعالانعان ويىنشى - «ابدىش-اتا» كومانداسىنىڭ قورعاۋشىسى كريستيان براۋزمان (450 مىڭ ەۋرو).
تۇرىكمەنستاندا بىرنەشە فۋتبولشى 200 مىڭ ەۋروعا باعالانعان.
