وڭتۇستىك كورەيانىڭ چوندجۋ قالاسىندا شايبالى حوككەيدەن ەرلەر اراسىنداعى ازيا چەمپيوناتى اياقتالدى. تۋرنيردە ونەر كورسەتكەن قازاقستان قۇراماسى بارلىق قارسىلاسىنان باسىم ءتۇسىپ، التىن مەدال يەگەرى اتاندى. بۇل تۋرالى قر تۋريزم جانە سپورت مينيسترلىگى سپورتتى دامىتۋ ديرەكتسياسى مالىمدەدى، دەپ حابارلايدى “ادىرنا”.
وسىلايشا، ۇلتتىق قۇراما 2024 جانە 2025 جىلدارداعى تابىسىن قايتالاپ، ازيا چەمپيونى اتاعىن ءۇشىنشى جىل قاتارىنان جەڭىپ الدى.
قازاقستاندىق حوككەيشىلەر جارىس بارىسىندا ءۇش كەزدەسۋ وتكىزىپ، ۇشەۋىندە دە جەڭىسكە جەتتى. العاشقى ويىندا جاپونيا قۇراماسىن 3:2 ەسەبىمەن ۇتسا، ەكىنشى كەزدەسۋدە قىتاي كومانداسىنا ەش مۇمكىندىك قالدىرماي، 5:0 ەسەبىمەن باسىم ءتۇستى.
شەشۋشى ماتچتا قازاقستاندىقتار تۋرنير قوجايىنى وڭتۇستىك كورەيا قۇراماسىمەن كەزدەستى. ويىننىڭ نەگىزگى ۋاقىتى گولسىز اياقتالىپ، جەڭىمپاز بۋلليتتەر سەرياسىندا انىقتالدى. ناتيجەسىندە وتانداستارىمىز 4:3 ەسەبىمەن جەڭىسكە جەتتى.
ءۇش كەزدەسۋدىڭ بارلىعىندا جەڭىسكە جەتكەن قازاقستان قۇراماسى تۋرنير كەستەسىندە ءبىرىنشى ورىنعا تۇراقتادى. جاپونيا قۇراماسى كۇمىس جۇلدەگە قول جەتكىزسە، وڭتۇستىك كورەيا حوككەيشىلەرى قولا مەدال يەلەندى.
وسىلايشا، قازاقستان قۇراماسى ازياداعى كوشباسشىلىعىن تاعى ءبىر مارتە دالەلدەپ، چەمپيوندىق اتاعىن ساقتاپ قالدى.
