اۋىل شارۋاشىلىعى مينيسترلىگىندە اگروونەركاسىپتىك كەشەندى دامىتۋ ماسەلەلەرى جونىندەگى قوعامدىق كەڭەس 2026–2030 جىلدارعا ارنالعان مال شارۋاشىلىعىن دامىتۋ جوسپارىنىڭ جوباسىن ماقۇلدادى. قۇجاتتا مال شارۋاشىلىعىن دامىتۋعا جانە سالانى بىلىكتى كادرلارمەن قامتاماسىز ەتۋگە باعىتتالعان شارالار كوزدەلگەن، دەپ حابارلايدى «ادىرنا» ءتىلشىسى.
مينيسترلىكتىڭ مالىمەتىنشە، جوسپار جوباسىندا مال شارۋاشىلىعى وكىلدەرىن الەۋمەتتىك قولداۋ ماسەلەلەرى قاراستىرىلعان. اتاپ ايتقاندا، قويشىلار مەن باقتاشىلاردىڭ زەينەت جاسىن تومەندەتۋ، اسكەري قىزمەتكە شاقىرۋدى كەيىنگە قالدىرۋ، سونداي-اق ولاردىڭ بالالارىنا ءبىلىم بەرۋ گرانتتارىن باسىم تارتىپپەن ءبولۋ ۇسىنىلادى.
اۋىل شارۋاشىلىعى ۆيتسە-ءمينيسترى امانعالي بەردالين كەشەندى جوسپار جوباسى ءوزارا تىعىز بايلانىستى ەكەنىن ءارى شىنايى تاجىريبەگە باعىتتالعان شارالار توپتاماسىن قامتيتىنىن اتاپ ءوتتى.
«قۇجاتتا مال شارۋاشىلىعىن قارجىلاندىرۋ تەتىكتەرىن قالىپتاستىرۋعا باسا نازار اۋدارىلعان. اتاپ ايتقاندا، جانۋارلاردىڭ بارلىق تۇرلەرى بويىنشا اسىل تۇقىمدى مالدى ساتىپ الۋعا جىلدىق 6% مولشەرلەمەمەن ۇزاق مەرزىمدى جەڭىلدەتىلگەن كرەديت بەرۋ باعدارلاماسىن ىسكە قوسۋ كوزدەلگەن.
اينالىم قاراجاتىن تولىقتىرۋ ءۇشىن مال شارۋاشىلىعىنىڭ ىشكى سالالارىنا شەكتەۋ قويىلماي، 5% مولشەرلەمەمەن كرەديت بەرۋ تەتىگىن ەنگىزۋ جوسپارلانۋدا. قاراجات جەم-ءشوپ ساتىپ الۋعا، جانار-جاعارماي ماتەريالدارىنا، ۆەتەريناريالىق پرەپاراتتارعا جانە باسقا دا وندىرىستىك شىعىندارعا باعىتتالۋى مۇمكىن»، – دەدى ۆيتسە-مينيستر.
