Auyl şaruaşylyǧy ministrlıgınde agroönerkäsıptık keşendı damytu mäselelerı jönındegı qoǧamdyq keŋes 2026–2030 jyldarǧa arnalǧan mal şaruaşylyǧyn damytu josparynyŋ jobasyn maqūldady. Qūjatta mal şaruaşylyǧyn damytuǧa jäne salany bılıktı kadrlarmen qamtamasyz etuge baǧyttalǧan şaralar közdelgen, dep habarlaidy «Adyrna» tılşısı.
Ministrlıktıŋ mälımetınşe, jospar jobasynda mal şaruaşylyǧy ökılderın äleumettık qoldau mäselelerı qarastyrylǧan. Atap aitqanda, qoişylar men baqtaşylardyŋ zeinet jasyn tömendetu, äskeri qyzmetke şaqyrudy keiınge qaldyru, sondai-aq olardyŋ balalaryna bılım beru granttaryn basym tärtıppen bölu ūsynylady.
Auyl şaruaşylyǧy vise-ministrı Amanǧali Berdalin keşendı jospar jobasy özara tyǧyz bailanysty ekenın ärı şynaiy täjıribege baǧyttalǧan şaralar toptamasyn qamtitynyn atap öttı.
«Qūjatta mal şaruaşylyǧyn qarjylandyru tetıkterın qalyptastyruǧa basa nazar audarylǧan. Atap aitqanda, januarlardyŋ barlyq türlerı boiynşa asyl tūqymdy maldy satyp aluǧa jyldyq 6% mölşerlememen ūzaq merzımdı jeŋıldetılgen kredit beru baǧdarlamasyn ıske qosu közdelgen.
Ainalym qarajatyn tolyqtyru üşın mal şaruaşylyǧynyŋ ışkı salalaryna şekteu qoiylmai, 5% mölşerlememen kredit beru tetıgın engızu josparlanuda. Qarajat jem-şöp satyp aluǧa, janar-jaǧarmai materialdaryna, veterinariialyq preparattarǧa jäne basqa da öndırıstık şyǧyndarǧa baǧyttaluy mümkın», – dedı vise-ministr.
