الەۋمەتتىك جەلىلەر مەن ءتۇرلى مەسسەندجەرلەردە قر پرەزيدەنتى جارلىعى بويىنشا 2023 جىلدىڭ 1 قاڭتارىنان ايەلدەردىڭ زەينەتكە شىعۋ جاسى 58 جاس بولىپ تومەندەيدى دەگەن اقپارات جالعان بولىپ شىقتى. بۇل جايلى قر ەڭبەك جانە حالىقتى الەۋمەتتىك قورعاۋ مينيسترلىگى:
"ايەلدەردىڭ زەينەتكە شىعۋىنىڭ زاڭنامامەن بەلگىلەنگەن جاسى حالىقارالىق جانە وتاندىق ساراپشىلار جۇرگىزگەن زەرتتەۋلەر ناتيجەلەرى مەن ۇزاق مەرزىمدى اكتۋارلىق بولجامدارعا نەگىزدەلگەن، حالىقارالىق پراكتيكاعا جانە الەمدەگى قالىپتاسىپ وتىرعان ەكونوميكالىق جانە دەموگرافيالىق جاعدايعا سايكەس كەلەتىنىن ەستەرىڭىزگە سالامىز. بەكىتىلگەن جاس مولشەرى بازالىق جانە ىنتىماقتى زەينەتاقىنى جانە بىرىڭعاي جيناقتاۋشى زەينەتاقى قورىنان تولەنەتىن تولەمدەردى ەسكەرە وتىرىپ، قازاقستاندىقتار قۇرمەتتى دەمالىسقا شىققاننان كەيىن ءتيىستى زەينەتاقى تولەمدەرىن قالىپتاستىرۋ قاجەتتىلىگىمەن نەگىزدەلگەن.
بۇل رەتتە ىنتىماقتى زەينەتاقى جۇيەسى بىرتىندەپ قىسقارۋدا، ويتكەنى ولاردى تاعايىنداۋ كەزىندە 1998 جىلعى 1 قاڭتارعا دەيىن، ياعني جيناقتاۋشى جۇيە ەنگىزىلگەنگە دەيىن ازىرلەنگەن ەڭبەك ءوتىلى ەسكەرىلەدى. وسىعان بايلانىستى مىندەتتى زەينەتاقى جارنالارى ەسەبىنەن قالىپتاستىرىلاتىن جيناقتاۋشى زەينەتاقىنىڭ ءرولى ارتادى، زەينەتاقى جارنالارىن اۋدارۋ كەزەڭى مەن مولشەرى نەعۇرلىم كوپ بولسا، ول سوعان سايكەس جوعارى بولادى", - دەدى.
وسى رەتتە، ىنتىماقتى زەينەتاقى جۇيەسى بىرتىندەپ قىسقارىلۋدا. سەبەبى، 1998 جىلعى 1 قاڭتارعا دەيىنگى، ياعني جيناقتاۋشى جۇيە تاعايىنداۋ كەزىندەگى ەڭبەك ءوتىلى ەسكەرىلەدى. سوعان بايلانىستى زەينەتاقى جارنالارىنان قالىپتاستىرىلاتىن جيناقتاۋشى زەينەتاقىنىڭ ءرولى دە ارتادى.
ايتا كەتۋ كەرەك، قولدانىستاعى زاڭناماعا سايكەس ازاماتتارعا زەينەتكەرلىككە ەرتە شىعۋىنا رۇقسات ەتىلگەن. ياعني، بجزق-دا ەرلەردىڭ زەينەتاقى جيناقتارى 55 جاسقا، ال ايەلدەردىكى 52,5 جاسقا تولعاندا، زەينەتاقى تولەمدەرىن الۋ قۇقىعىنا يە بولا الادى.
"ازاماتتاردان جالعان اقپاراتقا نازار اۋدارماۋدى جانە اقپاراتتى تەك رەسمي دەرەككوزدەردەن پايدالانۋدى سۇرايمىز: جالعان اقپارات تاراتۋ زاڭ بويىنشا جازالانادى", - دەپ ەسكەرتتى ۆەدومستۆو حالىققا.
داۋلەتحانقىزى روزا
