Jetısu oblysynda «Taza Qazaqstan» respublikalyq ekologiialyq baǧdarlamasy aiasynda öŋırdıŋ ekologiialyq ahualyn jaqsartuǧa baǧyttalǧan auqymdy jūmystar jüielı türde jüzege asyrylyp keledı. Ötken jylǧy jūmystyŋ nätijesı köŋılge qonymdy, biylǧa josparlanǧan ıstıŋ de ılkımdı bolaryna senım zor.
Memleket basşysy Qasym-Jomart Toqaev «Turkistan» gazetıne bergen sūhbatynda: «Men Prezident retınde «Taza Qazaqstan» aksiiasyn aldaǧy uaqytta da erekşe nazarymda ūstaimyn. Būl jūmystyŋ män-maŋyzy öte zor. Sebebı, «Taza Qazaqstan» jūrtty ünemşıl ärı aqpeiıl boluǧa, daŋǧazalyqtan aryluǧa, ünemı ızdenıp, alǧa ūmtyluǧa, ortaq jauapkerşılıktı ūmytpauǧa, elge janaşyrlyq tanytyp, qaiyrymdylyq jasauǧa ündeidı», – dep atap öttı. Osy ızgılıktı ıske jetısulyqtar şynaiy yqylaspen ün qosyp, ötken jyly oblys aumaǧynda auqymdy abattandyru jäne jaŋǧyrtu jūmystary atqaryldy. Atap aitqanda, qala jäne audan aumaqtarynda barlyǧy 21 saiabaq (13 saiabaq, 6 alleia, 2 skver), 2 ortalyq alaŋ, 49 aula, sondai-aq 81 balalar men sport alaŋy abattandyryldy. Sonymen qatar köpqabatty tūrǧyn üilerdıŋ 77 şatyry men 33 qasbetı jöndelıp, 16,5 şaqyrym aryq jelılerı qalpyna keltırıldı. Öŋırdegı 72 eskertkış jaŋǧyrtylyp, 315 şaqyrym köşe boiyna jaryq şamdary ornatyldy.
Baǧdarlama aiasynda tūrǧyndardyŋ ötınışterın qabyldap, naqty şaralar qabyldauǧa negız bolǧan telegram-bot ıske qosylǧany köpşılıkke mälım. Onyŋ jūmysy bastalǧaly berı 624 ötınış kelıp tüsıp, sonyŋ 525-ı oryndaldy. Al qarastyrylmaǧan 99 ötınıştıŋ mazmūny baǧdarlamadan tys, basqa mäselenı kötergen. Tek 2025 jyldyŋ özınde 279 ötınış tırkelıp, 215-ı oŋ şeşımın tapty.
«Taza Qazaqstan» baǧdarlamasynyŋ jalpyhalyqtyq sipat aluy jemıstı nätijege qol jetkızedı. Osy oraida oblys tūrǧyndarynyŋ belsendılıgın atap ötu maŋyzdy. Byltyr oblys boiynşa atalǧan baǧdarlama aiasyndaǧy ıs-şaralarǧa 227 myŋnan astam adam qatysty. Nätijesınde josparlanǧan 120 myŋ köşettıŋ ornyna 134 901 tüp köşet otyrǧyzylyp, 14 425 tonna qoqys şyǧaryldy.
Būl jūmystar biyl da jalǧasyn tabatyny anyq. Josparǧa säikes, 9 saiabaq (7 park, 2 alleia), 1 ortalyq alaŋ, 25 aula, 18 balalar jäne sport alaŋy abattandyrylady. Būdan bölek, köpqabatty tūrǧyn üilerdıŋ 61 şatyry men 49 qasbetı jöndelıp, 13,6 şaqyrym aryq jüiesı qalpyna keltırıledı. Sondai-aq, 200 şaqyrym köşenı jaryqtandyru közdelıp otyr.
Odan bölek, jaŋadan qūrylǧan «Alaköl-Tazalyq» jäne «Balqaş-Tazalyq» kommunaldyq käsıporyndaryn arnaiy tehnikamen qamtamasyz etu, sondai-aq Balqaş kölı jaǧalauyndaǧy kommunaldyq jaǧajailardy abattandyru josparlanuda.
Ekologiialyq mädeniettı qalyptastyryp, el men jerdıŋ körkın arttyruǧa jäne tūrǧyndarǧa qolaily orta qalyptastyruǧa baǧyttalǧan «Taza Qazaqstan» baǧdarlamasynyŋ mındetterıne är azamat jauapkerşılıkpen qarauǧa tiıs.
