يراننىڭ بۇۇ-داعى تۇراقتى وكىلى امير سايد يراۆاني بۇۇ باس حاتشىسى انتونيو گۋتەرريشكە جانە قاۋىپسىزدىك كەڭەسىنىڭ توراعاسىنا حات جولدادى، دەپ حابارلايدى "ادىرنا" ۇلتتىق پورتالى Al Jazeera-عا سىلتەپ.
ءيراۆانيدىڭ ايتۋىنشا، ترامپتىڭ يرانداعى نارازىلىقتارعا بايلانىستى جاساعان مالىمدەمەلەرى ارانداتۋشىلىق سيپاتقا يە جانە بۇۇ جارعىسى مەن حالىقارالىق قۇقىق نورمالارىن ورەسكەل بۇزادى. اقش پرەزيدەنتى ەگەر يراندا شەرۋشىلەرگە قارسى كۇش قولدانىلسا، ۆاشينگتون «كۇرەسۋگە دايىن» ەكەنىن ايتقان بولاتىن.
"قانداي دا ءبىر ىشكى تارتىپسىزدىكتەردى سىرتقى قىسىم نەمەسە اسكەري ارالاسۋ ارقىلى قوزدىرۋ، قولداۋ كورسەتۋ نەمەسە زاڭداستىرۋ يران يسلام رەسپۋبليكاسىنىڭ ەگەمەندىگىنە، ساياسي تاۋەلسىزدىگىنە جانە اۋماقتىق تۇتاستىعىنا قارسى اۋىر قۇقىقبۇزۋشىلىق بولىپ تابىلادى", — دەپ جازدى يراۆاني ءوز حاتىندا.
سونىمەن قاتار يران تاراپى مەملەكەتتىڭ ەگەمەندىگىن قورعاۋعا تولىق قۇقىعى بار ەكەنىن اتاپ ءوتىپ، بۇل قۇقىقتى «قاتاڭ ءارى تەڭگەرىمدى تۇردە» جۇزەگە اسىراتىنىن مالىمدەدى. يراۆاني اقش-تى زاڭسىز قاۋىپ-قاتەرلەر مەن ودان تۋىندايتىن شيەلەنىستەردىڭ بارلىق سالدارى ءۇشىن جاۋاپكەرشىلىكتى ءوز موينىنا الۋعا شاقىردى.
