ۋكراينا پرەزيدەنتى ۆلاديمير زەلەنسكي ۆاشينگتونعا وزىنە قاجەت قارۋ تۇرلەرىنىڭ ءتىزىمىن جاساپ جىبەرمەكشى - وعان كيەۆ اقش-تان قالايتىن بارلىق قارۋ-جاراق كىرەدى. بۇل تۋرالى اقپارات كوزدەرىنە سىلتەمە جاساپ CNN جاريالادى، دەپ حابارلايدى “ادىرنا” ۇلتتىق پورتالى.
باسىلىمنىڭ حابارلاۋىنشا، زەلەنسكي اقش كونگرەسىنىڭ مۇشەلەرىنە بۇل ءتىزىمدى مەملەكەتتەرگە جىبەرۋ جوسپارى تۋرالى ايتقان.
«وكىلدەر پالاتاسىنىڭ سىرتقى ىستەر كوميتەتىنىڭ توراعاسى مايكل ماككوللمەن جانە پالاتانىڭ تاعى ءتورت مۇشەسىمەن كەزدەسكەن زەلەنسكي توپقا قارۋ-جاراق ءتىزىمىن، سونىڭ ىشىندە F-16 جويعىش ۇشاقتارىن جىبەرۋدى جوسپارلاپ وتىرعانىن ايتتى. ونىڭ پىكىرىنشە، بۇل جاعدايدى تەزدەتۋ ءۇشىن قاجەت»، دەپ جازادى تەلەارنا.
ەستەرىڭىزگە سالا كەتەيىك، بۇعان دەيىن امەريكالىق كوشباسشى دجو بايدەن ۋكرايناعا F-16 ۇشاعىن جەتكىزۋدەن باس تارتقانىن ايتقان بولاتىن.
ۋكرايناعا جويعىش ۇشاقتاردى بەرۋ ماسەلەسى قاڭتار ايىنىڭ سوڭىنان بەرى تالقىلانىپ جاتىر. 25 قاڭتاردا باتىس تانكتەرىن قابىلداۋداعى تابىستان كەيىن ۋكراينا پرەزيدەنتى ۆلاديمير زەلەنسكي وداقتاستاردى ۋكراينا قارۋلى كۇشتەرىنە جاۋىنگەرلىك ۇشاقتاردى جەتكىزۋ قاجەتتىلىگىنە بەلسەندى تۇردە سەندىرە باستادى. 8 اقپاندا زەلەنسكي لوندوندا كيەۆكە جويعىش ۇشاقتاردى بەرۋ تۋرالى تاعى ءبىر ءوتىنىش جاسادى.
