قازاقستاندا كوكتەمنىڭ باستى مەرەكەسى – ناۋرىز مەيرامىن باسقاشا تليلاماق. مادەنيەت جانە اقپارات مينيسترلىگى قازىرگى ۋاقىتتا بارلىق مۇددەلى مەملەكەتتىك ورگاندارمەن بىرلەسىپ ناۋرىز مەيرامىن تويلاۋدىڭ جاڭا تاسىلدەرى ازىرلەنىپ جاتقانىن ايتتى، دەپ حابارلايدى “ادىرنا” ۇلتتىق پورتالى Tengri Life-قا سىلتەپ.
مينيسترلىك اتاپ وتكەندەي، قۇجات تالقىلاۋ ساتىسىندا جانە اعىمداعى جىلدىڭ ناۋرىز ايىنىڭ باسىندا كوپشىلىككە جاريالانادى.
قوسىمشا تۇسىنىكتەمە الۋ ءۇشىن استانا جانە الماتى قالالارى اكىمدىكتەرىنىڭ ءباسپاسوز قىزمەتىنە جۇگىنىلگەن.
ناۋرىز تۇركى حالىقتارى ءۇشىن ءدىني ادەت-عۇرىپقا تىكەلەي قاتىسى جوق ءداستۇرلى كوكتەم مەرەكەسى. ناۋرىز كوكتەمگى كۇن مەن ءتۇننىڭ تەڭەلەتىن كۇندەرى تويلانادى. ەجەلگى ادەت-عۇرىپ بويىنشا، مەرەكە الدىندا ادامدار ءوز ۇيلەرىن، اينالاسىن تازارتىپ، قارىزدارىن وتەۋى كەرەك.
ال ناۋرىز قازىرگى قازاقستاندىقتار ءۇشىن تۇركى كوشپەلى مادەنيەتىن ۇلىقتاۋ كۇنى. بۇل كۇندەرى ەلىمىزدىڭ تۇكپىر-تۇكپىرىندە كيىز ۇيلەر تىگىلىپ، قازاقتىڭ ۇلتتىق تاعامدارى – ناۋرىز-كوجە، باۋىرساق، شەلپەك، جەنت، قىمىز جانە باسقا دا تاعامدار تاراتىلدى.
قازىر قازاقستاندا ناۋرىزدىڭ قالاي تويلاناتىنى ازىرگە بەلگىسىز.
ەسكە سالايىق، بۇعان دەيىن «ەگەمەن قازاقستان» گازەتىنە بەرگەن سۇحباتىندا قازاقستان پرەزيدەنتى قاسىم-جومارت توقاەۆ ول ءۇشىن جاڭا جىلدىڭ قاسيەتتى ءمانى جوق ەكەنىن ايتقان بولاتىن. ەلباسى ءبىزدىڭ دە ءتول جاڭا جىلىمىز – ناۋرىز مەيرامى بار ەكەنىن، ول تابيعاتتىڭ جاڭا تىرشىلىك تسيكلىنىڭ باستاۋىن بىلدىرەتىنىن اتاپ ءوتتى.
«ناۋرىز مەيرامى جاڭارۋدى بىلدىرەدى، سونىمەن قاتار ونى جاڭاشا: مازمۇندى، جاسامپاز، جاڭا ەرەكشەلىكتەردى ەنگىزۋ ارقىلى تويلاۋ قاجەت. بۇل قوعامدى بىرىكتىرۋگە جانە ۇلتتىق بىرەگەيلىگىمىزدى نىعايتۋعا سەپتىگىن تيگىزەتىنىنە سەنىمدىمىن»، - دەدى مەملەكەت باسشىسى.
