فرانتسيا پرەزيدەنتى ەممانۋەل ماكرون 5 ناۋرىز كۇنى ۇلتقا ارناعان ۇندەۋىندە ۋكرايناعا قاتىستى ماڭىزدى مالىمدەمەلەر جاسادى، دەپ حابارلايدى “ادىرنا” ۇلتتىق پورتالى جەرگىلىكتى باق-قا سىلتەپ.
ماكرون ءوز سوزىندە رەسەيدى فرانتسيا مەن ەۋروپاعا قاۋىپ توندىرەتىن مەملەكەت دەپ اتادى. سونداي-اق ول رەسەيدىڭ ۋكرايناداعى سوعىستى توقتاتۋعا قارسى ەكەنىن ءبىلدىردى.
“ رەسەيدىڭ سوزىنە سەنۋگە بولمايدى. ۋكراينا بەيبىتشىلىك پەن قاۋىپسىزدىككە قۇقىلى، بۇل – ءبىزدىڭ مۇددەمىزگە ساي كەلەدى”، – دەدى.
ماكرون ۇندەۋىندە ەلدىڭ يادرولىق قارۋىن بۇكىل ەۋروپا قاۋىپسىزدىگى ءۇشىن پايدالانۋدى تالقىلاۋعا دايىن ەكەنىن مالىمدەدى. سونىمەن قاتار، ماكرون ۋكرايناعا ەۋروپالىق اسكەر ورنالاستىرۋ مۇمكىندىگىن قولدايتىنىن جەتكىزدى.
ماكروننىڭ ۇلتقا ۇندەۋىندەگى باستى مالىمدەمەلەرى مىناداي:
"رەسەي فرانتسيا مەن ەۋروپاعا قاۋىپ ءتوندىرىپ تۇر. ءبىز 2014 جىلى مينسك كەلىسىمدەرىن جاسادىق، بىراق رەسەي ونى بۇزدى. ءبىز رەسەيمەن جاسالعان كەلىسىمدەرگە سەنە المايمىز. 2030 جىلعا قاراي رەسەي 3 ميلليون ساربازدى جۇمىلدىرۋدى جانە 4 مىڭ تانك جاساۋدى جوسپارلاپ وتىر. بەيبىتشىلىك ءبىزدىڭ قۇرلىققا تەك «تىنىشتاندىرىلعان رەسەيمەن» عانا ورالادى. بەيبىتشىلىك «كەز كەلگەن باعامەن، رەسەي ديكتاتى اياسىندا ورناماۋى كەرەك جانە ۋكراينا كاپيتۋلياتسياعا بارماۋى ءتيىس». ۋكرايناعا ەۋروپالىق اسكەرلەردى ورنالاستىرۋ مۇمكىندىگىن جوققا شىعارمادى. فرانتسيانىڭ يادرولىق قارۋىن بۇكىل ەو-نى قورعاۋ ءۇشىن پايدالانۋ تۋرالى پىكىرتالاس باستاۋدى شەشتى. فرانتسيادا ەۋروپاداعى ەڭ ءتيىمدى اسكەر بار. كەلەسى اپتادا فرانتسيا ۋكرايناداعى بولاشاق بەيبىتشىلىكتى قامتاماسىز ەتۋگە دايىن ەلدەردىڭ شتاب باسشىلارىن جينايدى. اقش-تىڭ باج سالىعىن ەنگىزۋى جاعدايىندا قارىمتا شارا قولدانامىز دەپ سەس كورسەتتى", - دەدى ول ءوز سوزىندە.
ونىڭ ايتۋىنشا، كەلەسى اپتادا پاريجدە ۋكرايناداعى تۇراقتى بەيبىتشىلىكتى قامتاماسىز ەتۋگە دايىن ەلدەردىڭ شتاب باسشىلارى باس قوسادى.
رەسەي قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆ ماكروننىڭ مالىمدەمەسىنە دەرەۋ جاۋاپ بەردى.
“ماكروننىڭ ءوزى اسا قاۋىپتى ەمەس، ول 2027 جىلدىڭ 14 مامىرىنان كەشىكپەي ساياسي ساحنادان كەتەدى” - دەپ پىكىر ءبىلدىردى.
ال رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا ماكروننىڭ ريتوريكاسىن ەسكەرە وتىرىپ، فرانتسيانىڭ جاڭا ەلشىسى نە ءۇشىن ماسكەۋگە بارا جاتقانىن سۇرادى.
