ءماجىلىس دەپۋتاتى ايدوس سارىم الەۋمەتتىك جەلىلەردە كاسپي قۇبىر كونسورتسيۋمىنىڭ تەرمينالىنا جاسالعان شابۋىلدى قولداعان ازاماتتاردى جاۋاپكەرشىلىككە تارتۋدى تالاپ ەتىپ، باس پروكۋرور مەن مادەنيەت جانە اقپارات مينيسترىنە ۇندەۋ جولدادى، دەپ حابارلايدى «ادىرنا» ءتىلشىسى.
بۇعان دەيىن قازنەت قولدانۋشىلارى مەملەكەت ءۇشىن ستراتەگيالىق ماڭىزى بار ينفراقۇرىلىم نىسانىنا جاسالعان شابۋىلداردى اشىق تۇردە اقتاعان ەدى. ءماجىلىس دەپۋتاتىنىڭ پىكىرىنشە، مۇنداي ارەكەتتەر ءسوز بوستاندىعىنا بەرىلەتىن كونستيتۋتسيالىق قۇقىق شەگىنەن اسىپ، ۇلتتىق مۇددەلەرگە تىكەلەي زيان كەلتىرەدى.
ايدوس سارىم باس پروكۋراتۋرادان اتالعان جاريالانىمدارعا قۇقىقتىق باعا بەرىپ، ولاردى تەرروريزمدى ناسيحاتتاۋ (قر قك 256-بابى) نەمەسە مەملەكەتتىك وپاسىزدىق (قر قك 175-بابى) رەتىندە قاراستىرۋدى سۇرادى.
سونىمەن قاتار ول حالىق اراسىندا ءتۇسىندىرۋ جۇمىستارىن جۇرگىزىپ، مۇناي قۇبىرلارى مەن ەلدىڭ ەكونوميكالىق قاۋىپسىزدىگى ءۇشىن اسا ماڭىزدى وزگە دە ينفراقۇرىلىم نىساندارىن جويۋعا شاقىراتىن اقپاراتتى تاراتۋعا بولمايتىنىن ءتۇسىندىرۋدى ۇسىندى.
ايتا كەتەيىك، كقك — قازاقستان مۇنايىن ەكسپورتتاۋدىڭ نەگىزگى باعىتى. ەل جىل سايىن وسى قۇبىر ارقىلى كەمىندە 60 ميلليون توننا مۇناي جونەلتەدى. قازىرگى ۋاقىتتا قازاقستان شابۋىلدان كەيىنگى شىعىنداردى ەسەپتەپ جاتىر. ەنەرگەتيكا ءمينيسترى ەرلان اقكەنجەنوۆتىڭ مالىمدەۋىنشە، قازاقستان شابۋىل سالدارىنان كەم دەگەندە 480 مىڭ توننا مۇناي وندىرە الماي قالعان.
ەسكە سالايىق، 29 قاراشادا استانا ۋاقىتىمەن 06:06-دا نوۆوروسسيسك پورتى اۋدانىندا كقك-نىڭ تەڭىز ينفراقۇرىلىم نىساندارىنا ەكيپاجى جوق ءجۇزۋ قۇرالدارى ارقىلى شابۋىل جاسالعان ەدى. شابۋىل ناتيجەسىندە تەڭىزدەگى قاشىقتاعى ايلاق قوندىرعىسى ۆپۋ-2 (قالقىمالى تيەۋ قۇرىلعىسى) ايتارلىقتاي زاقىمدالعان.
