Qazaqstannyŋ eks-prezidentı Nūrsūltan Nazarbaev pen Özbekstan prezidentı Şavkat Mirziioev bır-bırın telefon arqyly kele jatqan Jaŋa jylmen qūttyqtady. Būl turaly Özbekstan prezidentınıŋ baspasöz qyzmetı mälımet taratty, dep habarlaidy “Adyrna”.
“Olar tūtas bauyrlastyq, tatu körşılık, strategiialyq serıktestık jäne odaqtastyq qatynastardy, sondai-aq Özbekstan men Qazaqstan arasyndaǧy köpqyrly yntymaqtastyqty odan ärı damytudy atap öttı”, delıngen habarlamada.
Aita ketsek, Qazaqstannyŋ būrynǧy Prezidentı Nūrsūltan Nazarbaev Äzerbaijan prezidentı İlham Älievtı de tuǧan künımen Toqaevtan būryn 19 jeltoqsanda qūttyqtap qoiǧan edı.
Al Qazaqstan Prezidentı Qasym-Jomart Toqaev 24 jeltoqsanda telefon arqyly qūttyqtaǧan bolatyn.
Biyldyqqa kökjiekten körınbei ketken Nazarbaev jyl soŋynda nius-meikerge ainaldy. Onyŋ 27 jeltoqsan künı Kremlde Resei basşysy Vladimir Putinmen kezdesuı de jūrtşylyq nazaryn erekşe audarǧan. Nūrsūltan Nazarbaev 2019 jyly prezidenttıkten ketken soŋ jyl saiyn bır-ekı märte Vladimir Putinge tūraqty türde baryp tūratyny baiqalǧan. Olar jeltoqsandaǧy kezdesuden būryn 2025 jylǧy 29 mamyrda jüzdeskenı habarlanǧan. Alaida soŋǧy kezdesuı qoǧamdyq pıkır tarapynan qataŋ synǧa ūşyrady. Mäselen, mäjılıs deputaty Ermūrat Bapi ūlttyq qauıpsızdıktı qamtamasyz etu maqsatynda memlekettık qūpiialarǧa qol jetkızgen būrynǧy joǧary lauazymdy tūlǧalardyŋ şetelge şyǧuyn zaŋnamalyq tūrǧyda retteudı ūsynǧan.
"Eldıŋ qauıpsızdıgın qamtamasyz etu maqsatynda memlekettık qūpiiany bıletın tūlǧanyŋ (eks-prezident bolsyn, ministr nemese basqa da lauazym iesı bolsyn) şet elge şyǧu mümkındıgın retteitın zaŋ qajet şyǧar",- degen edı deputat.
Al 85 jastaǧy Nazarbaevtyŋ körşı elder prezidentterın Qazaqstannyŋ resmi basşysynan būryn qūttyqtauy qandai etika, qandai müddege säikes keluı mümkın?
