مەملەكەت باسشىسى قاسىم-جومارت كەمەلۇلى توقاەۆ ءوز جولداۋىندا: «بالا تاربيەسى – اسا ماڭىزدى مەملەكەتتىك ءىس. ءاربىر اۋىلدىڭ مەكتەبى قالاداعى مەكتەپتەن كەم بولماۋعا ءتيىس» دەپ اتاپ ءوتىپ، سونداي-اق ء«ۇش اۋىسىمدى جانە اپاتتى مەكتەپتەردىڭ سانىن ازايتۋ – باستى مىندەت» دەگەن ناقتى تاپسىرما بەرگەن بولاتىن.
اتالعان تاپسىرمالاردىڭ جۇيەلى جۇزەگە اسىرىلۋى، «AMANAT» پارتياسىنىڭ سايلاۋالدى باعدارلاماسىنىڭ جۇزەگە اسۋى ناتيجەسىندە اۋدانىمىزداعى ەڭسەلى ءبىلىم ورداسى قاراوزەن مەكتەپ-ليتسەيى كۇردەلى جوندەۋدەن ءوتىپ، مەكتەپ جانىنداعى ينتەرنات تا تولىق جاڭارىپ، زامان تالابىنا ساي كەيىپكە ەنىپ، پايدالانۋعا بەرىلدى.
سالتاناتتى ءىس-شاراعا باتىس قازاقستان وبلىسى اكىمىنىڭ ورىنباسارى قايىرجان مەندىعاليەۆ، اۋدان اكىمى اسلانبەك سارقۇلوۆ، اۋداندىق ءماسليحات توراعاسى سارسەنباي مولداشەۆ، اۋداندىق ءماسليحات دەپۋتاتتارى، ارداگەر ۇستازدار، ءبىلىم سالاسىنىڭ قىزمەتكەرلەرى جانە اۋىل تۇرعىندارى قاتىستى.
وبلىس اكىمىنىڭ ورىنباسارى قايىرجان ەرمەكۇلى ءوزىنىڭ قۇتتىقتاۋ سوزىندە وڭىردە 6 مەكتەپ كۇردەلى جوندەۋدەن وتكەنىن اتاپ ءوتتى.
— مەملەكەت باسشىسى قاسىم-جومارت كەمەلۇلى توقاەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم قوعامدىق وپتيميزم» اتتى جولداۋىندا ەلىمىزدەگى 1300 مەكتەپكە كۇردەلى جوندەۋ جۇرگىزۋ قاجەت دەگەن بولاتىن. ونىڭ ىشىندە، 2025 2027 جىلدارعا ءبىزدىڭ وبلىسىمىزدا 86 مەكتەپتىڭ كۇردەلى جوندەۋى جوسپارلانعان بولاتىن. وسى تاپسىرمانى ورىنداۋ ماقساتىندا بيىلعى جىلى وبلىستا 6 مەكتەپ كۇردەلى جوندەۋدەن وتكىزىلدى، سونىڭ ءبىرى قاراوزەن مەكتەپ-ليتسەيى. جالپى كازتالوۆ اۋدانىندا سوڭعى 4 جىلدا 4 مەكتەپ كۇردەلى جوندەۋدەن وتسە، 5 جاڭا مەكتەپ پايدالانۋعا بەرىلدى. جۇرگىزىلگەن جۇمىستار ءبىلىم ساپاسىنىڭ ارتۋىنا وڭ ىقپالىن تيگىزەتىنىنە سەنىمدىمىن. سونىمەن قاتار كۇردەلى جوندەۋ جۇمىستارى بارىسىندا جاز ايلارىندا مەكتەپ جانىنداعى ينتەرناتتا توتەنشە جاعداي ورىن العانى بارشاڭىزعا بەلگىلى. اتالعان كەمشىلىكتى جويۋدى مەردىگەر، «جايىق سيتي» جاۋاپكەرشىلىگى شەكتەۋلى سەرىكتەستىگىنىڭ باسشىسى مەرەكە قونىسبايۇلى مولداعاليەۆ ءوز قاراجاتى ەسەبىنەن جۇرگىزۋدى موينىنا العان بولاتىن. بۇگىنگى كۇنى مەكتەپ ينتەرناتى تولىعىمەن قالىپقا كەلتىرىلدى. مىنە، وسىنداي ازاماتتارىمىزدىڭ بارى ءبىزدى قۋانتادى. وسى ورايدا، وبلىس اكىمى ناريمان تورەعاليۇلى جانە اۋىل تۇرعىندارى اتىنان مەرەكە قونىسبايۇلىنا العىسىمىزدى بىلدىرەمىز، — دەدى ول.
قاراوزەن مەكتەپ-ليتسەيى 1978 جىلى پايدالانۋعا بەرىلىپ، 2025 جىلى كۇردەلى جوندەۋدەن وتكىزىلدى. جوندەۋ جۇمىستارىنىڭ ناتيجەسىندە مەكتەپتىڭ ماتەريالدىق-تەحنيكالىق بازاسى نىعايىپ، وقۋشىلار مەن پەداگوگتەر ءۇشىن زاماناۋي، قاۋىپسىز ءارى قولايلى وقۋ ورتاسى قالىپتاستىرىلدى. مەكتەپ-ليتسەيدىڭ جوبالىق قۋاتتىلىعى 350 ورىنعا ەسەپتەلگەن. قازىرگى تاڭدا ءبىلىم بەرۋ ۇيىمىندا 228 وقۋشى ءبىلىم الۋدا، ونىڭ ىشىندە 14 بالا مەكتەپالدى دايارلىق سىنىبىندا تاربيەلەنۋدە. وقۋ ۇدەرىسىن 44 بىلىكتى پەداگوگ قامتاماسىز ەتەدى. ءبىلىم ساپاسىنىڭ كورسەتكىشى 72 پايىزدى قۇرايدى. ءبىلىم بەرۋ ۇيىمىندا وقۋ پروتسەسى ەكى اۋىسىمدا ۇيىمداستىرىلعان، سىنىپ-كومپلەكت سانى – 16.
اۋىل حالقى دا ءبىلىم ورداسىنىڭ جاڭا كەيىپكە ەنۋىن زور ريزاشىلىقپەن قابىلدادى.
— مەملەكەت باسشىسىنىڭ باستاماسىمەن جانە ءوڭىر باسشىلىعىنىڭ قولداۋىمەن اۋدانىمىزدا اۋقىمدى جۇمىستار جۇيەلى تۇردە جۇزەگە اسىرىلۋدا. اتالعان مەكتەپ – اۋدانىمىزداعى ىرگەلى ءبىلىم بەرۋ وشاقتارىنىڭ ءبىرى. كۇردەلى جوندەۋدەن ءوتىپ، زاماناۋي تالاپتارعا ساي تولىقتاي جابدىقتالۋى بارشا اۋىل تۇرعىندارىنىڭ كوڭىلىنەن شىقتى. ەل بولاشاعى ءۇشىن اتقارىلىپ جاتقان بۇل يگى ىسكە ۇيىتقى بولعان قازاقستان رەسپۋبليكاسىنىڭ پرەزيدەنتىنە، وبلىس جانە اۋدان اكىمدەرىنە اۋىل اقساقالدارى اتىنان شەكسىز العىسىمىزدى بىلدىرەمىز، — دەدى قاراوزەن اۋىلىنىڭ باتاگوي اقساقالى بولات بەكەشوۆ.
