الماتى وبلىسىنىڭ قوناەۆ قالاسىندا وقۋشىلار تالىپ قالعانعا كەڭىردەكتەن قىسىپ ويناعاننىڭ سالدارىنان ءجاسوسپىرىم ءتورت تىسىنەن ايىرىلعان، دەپ حابارلايدى “ادىرنا” ۇلتتىق پورتالى.
Astana TV ارناسىنىڭ حابارلاۋىنشا، قوناەۆ قالاسىنىڭ تۇرعىنى بالاسىنىڭ مەكتەپ قابىرعاسىندا وزگە وقۋشىلارمەن قاۋىپتى ويىن ويناپ، سونىڭ سالدارىنان زارداپ شەككەنىن جەتكىزدى. وقۋشىلار ءبىرىن-ءبىرى تۇنشىقتىرىپ ويناپ، ەسىن جوعالتقان ۇلى تابالدىرىققا قۇلاپ، 4 ءتىسى ءتۇسىپ قالعان. اناسىنىڭ ايتۋىنشا، بالا نە ءۇشىن قۇلاعانىن جاسىرىپ، ويىن تۋرالى ءسوز قاتپادى. الايدا انا نە بولعانىن كەيىن تۇسىنگەن.
ويىن ەرەجەسى بويىنشا بىرەۋ ەكىنشى ادامدى قابىرعاعا تىرەپ، كەۋدەسىنەن باسىپ، موينىنداعى تامىرىن قىسادى. ول ەسىن جوعالتىپ، تالىپ قۇلايدى دا، 10-15 سەكۋندتان كەيىن قايتا ەسىن جيادى. مەكتەپ وقۋشىلارى مۇنى قىزىق كورىپ، ءجيى جاساپ كورەدى.
“ماعان دا ىستەدى. مەن بىر-ەكى شاپالاقتان كەيىن ەسىمدى جيدىم. بىراق اراسىندا ويانباي قالاتىندار دا بولدى. ءتىپتى 103 شاقىرىپ، ارەڭ امان الىپ قالعان وقيعالار ورىن الدى. ەيفوريا بولىپ، كوزىڭ قاراۋىتادى، ەسىڭ جوعالادى”، – دەدى الماتى تۇرعىنى.
پسيحولوگ مارجان ەلىقۇلوۆا مۇنداي ويىنداردى قولدامايدى. ونىڭ ايتۋىنشا، بۇل اعزاعا دا، ادامنىڭ پسيحولوگياسىنا دا كەرى اسەر ەتەدى.
“ەسەڭگىرەگەن ءساتى بالاعا قىزىق بولىپ كورىنۋى مۇمكىن. ەيفورياعا تۇسەدى. بىراق ەيفورياعا ەلىكتەۋشى، تىم بەلسەندى بالالار تۇسۋگە بەيىم. ال ۇندەمەي وتىراتىن، پسيحولوگيالىق قىسىم كورسەتۋدى وزىنە مۇرسات بەرەتىن وقۋشىلار ويانباي قالىپ، ءتۇبى جامان نارسەگە اكەپ سوقتىرۋى مۇمكىن”، – دەدى پسيحولوگ-مامان.
قوعام قايراتكەرلەرى دە بالالار اراسىندا قاتىگەز ويىنداردىڭ بەلەڭ الىپ بارا جاتقانىنا الاڭداۋلى. 50 جىل ۇستاز بولعان اياگۇل ميرازوۆا تاربيەنىڭ مەكتەپتە دە، ۇيدە دە اقساپ تۇرعانىن جەتكىزدى.
“قازىر بالالاردىڭ اراسىندا قاتىگەزدىكتىڭ ءتۇرى شارىقتاپ جاتىر. قازىرگى تاڭدا شىن مانىسىندە اتا-انالارعا، دا ۇستازدارعا دا وڭاي ەمەس. جالعىز ويىنمەن عانا ەمەس، جالپى تاربيەمەن كۇرەسۋىمىز كەرەك. زاڭ قاراستىرۋ كەرەك”، – دەدى ول.
