اباي وبلىسىندا مەكتەپ قازاندىعى جارىلىپ، جۇمىسشى زارداپ شەكتى. بۇل تۋرالى وبلىستىق ءبىلىم باسقارماسى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، بۇگىن ءۇرجار اۋىلى باۋىرجان مومىشۇلى اتىنداعى ورتا مەكتەپتىڭ بولەك ورنالاسقان قازاندىعىندا جارىلىس بولعان. الدىن الا دەرەكتەر بويىنشا، اپاتتىڭ سەبەبى – جىلۋ جۇيەسىندەگى اينالىمنىڭ بۇزىلىپ، قازاندىقتاعى قىسىمنىڭ كوتەرىلۋى.
“جارىلىس سالدارىنان 18 شارشى مەتر الاڭدا قازاندىق شاتىرىنىڭ جارتى بولىگى وپىرىلدى. وقيعا ورنىندا تجد جانە جەرگىلىكتى اتقارۋشى ورگاندار جۇمىس ىستەپ جاتىر. 1970 جىلعى جۇمىسشى 2-3-دارەجەلى كۇيىك الدى. زارداپ شەككەن ادام اۋداندىق اۋرۋحانانىڭ حيرۋرگيا بولىمىنە جاتقىزىلدى. قازىر جاعدايى تۇراقتى”، – دەلىنگەن وبلىستىق ءبىلىم باسقارماسى حابارلاماسىندا.
ۆەدومستۆو مالىمەتىنشە، 943 وقۋشى مەن 117 مۇعالىمنىڭ ءبىلىم بەرۋ پروتسەسى توقتاتىلعان جوق. رەزەرۆتىك قازاندىقتىڭ ارقاسىندا مەكتەپ عيماراتىنا جىلۋ بەرىلىپ جاتىر.
دەمالىس كۇندەرى جاڭا قازاندىق ورناتۋ جوسپارلانعان.
