شىعىس قازاقستانداعى "ۆوستوكتسۆەتمەت" جشس شاحتاسىندا ءتورت ادام قازا تاپتى، دەپ حابارلايدى “ادىرنا” ۇلتتىق پورتالى.
قايعىلى وقيعا 31 تامىز كۇنى ساعات 17:30-دا بولعان. تجد كەنشىلەردىڭ بەلگىسىز زاتتان ۋلانىپ كوز جۇمعانىن حابارلادى.
ودان وزگە تاعى ءبىر ادام شىعىس قازاقستان وبلىسى گلۋبوكوۆسكي اۋداندىق اۋرۋحاناسىنا جاتقىزىلدى.
كەنىشكە يەلىك ەتەتىن KAZ Minerals كومپانياسى قايعىلى وقيعانىڭ بولعانىن راستادى. كومپانيا "ۆوستوكتسۆەتمەت" جشس كەنىشىندەگى جۇمىسشىلاردىڭ ءولىمىنىڭ ءمان-جايى مەن سەبەپتەرى انىقتالىپ جاتقانىن حابارلادى.
"وقيعانىڭ ءمان-جايى مەن سەبەپتەرى انىقتالۋدا، قايعىلى وقيعانى تەرگەۋ ءۇشىن KAZ Minerals توبىنىڭ ديرەكتورلار كەڭەسىنىڭ توراعاسى ولەگ نوۆاچۋك ەرتىس كەنىشىنە جەكە قاتىسۋ ءۇشىن بارعان", - دەپ حابارلادى كومپانيا.
KAZ Minerals كومپانياسى قازا بولعانداردىڭ تۋىستارى مەن جاقىندارىنا كوڭىل ايتىپ، "وتباسىنا جان-جاقتى كومەك كورسەتۋگە" ۋادە بەردى.
قازىر وقيعاعا قاتىستى تەرگەۋ جۇرگىزىلىپ جاتىر.
"تەرگەۋ جۇرگىزىلىپ جاتىر. وقيعانىڭ بارلىق ءمان-جايى انىقتالۋدا", - دەپ حابارلادى وبلىستىق پوليتسيا.
