قازاقستاندا تەڭگەنى ۇلتتىق ۆاليۋتا رەتىندە كونستيتۋتسيا دەڭگەيىندە بەكىتۋ تۋرالى ۇسىنىس قولداۋ تاپتى، دەپ حابارلايدى "ادىرنا" ۇلتتىق پورتالى.
بۇل تۋرالى كونستيتۋتسيالىق كوميسسيانىڭ توعىزىنشى وتىرىسىندا كونستيتۋتسيالىق سوت توراعاسىنىڭ ورىنباسارى باقىت نۇرمۇحانوۆ مالىمدەدى.
ونىڭ ايتۋىنشا، اتالعان باستاما جاڭا كونستيتۋتسيا جوباسىندا ناقتى كورىنىس تابادى. اتاپ ايتقاندا، جوباعا كونستيتۋتسيانىڭ 2-بابىن جاڭا 6-تارماقپەن تولىقتىرۋ ۇسىنىلعان. وندا قازاقستان رەسپۋبليكاسىنىڭ ۇلتتىق ۆاليۋتاسى – تەڭگە ەكەنى جانە تەڭگەنى ەميسسيالاۋ قۇقىعى تەك قازاقستان رەسپۋبليكاسىنا تيەسىلى ەكەنى كورسەتىلەدى.
باقىت نۇرمۇحانوۆتىڭ سوزىنشە، تەڭگەنىڭ مارتەبەسىن كونستيتۋتسيالىق دەڭگەيدە بەكىتۋ تۋرالى ۇسىنىس بۇعان دەيىن كوميسسيا وتىرىستارىندا تالقىلانعان. بۇل ماسەلە ءماجىلىس دەپۋتاتتارى ايداربەك قوجانازاروۆ پەن نۇرتاي ءسابيليانوۆ تاراپىنان كوتەرىلگەن. سونىمەن قاتار، ازاماتتاردان تۇسكەن وتىنىشتەر مەن ۇسىنىستاردا دا ۇلتتىق ۆاليۋتانىڭ مارتەبەسىن ناقتىلاۋ قاجەتتىگى ايتىلعان.
ايتا كەتەيىك، كونستيتۋتسيالىق كوميسسيا جاڭا كونستيتۋتسيا جوباسىن جەتىلدىرۋ باعىتىندا بىرقاتار نورمالاردى قاراستىرىپ جاتىر.
