22 جەلتوقسان كۇنى ماسكەۋدە جەڭىل اۆتوكولىكتە جارىلىس بولىپ، رەسەي قارۋلى كۇشتەرى باس شتابىنىڭ جەدەل دايارلىق باسقارماسىن باسقارعان گەنەرال-لەيتەنانت فانيل سارۆاروۆ اۋىر جاراقات الىپ، وقيعا ورنىندا كوز جۇمدى. بۇل تۋرالى BBC جازدى، دەپ حابارلايدى «ادىرنا».
«22 جەلتوقسان كۇنى تاڭەرتەڭ ماسكەۋدىڭ ياسەنەۆ كوشەسىندە اۆتوكولىكتىڭ استىڭعى بولىگىنە ورناتىلعان جارىلعىش قۇرىلعى ىسكە قوسىلدى. العان جاراقاتتارىنىڭ سالدارىنان رف قارۋلى كۇشتەرى باس شتابى جەدەل دايارلىق باسقارماسىنىڭ باسشىسى، گەنەرال-لەيتەنانت فانيل سارۆاروۆ قازا تاپتى»، - دەدى رف تەرگەۋ كوميتەتىنىڭ رەسمي وكىلى سۆەتلانا پەترەنكو. .
بۇعان دەيىن باق پەن تەرگەۋ كوميتەتى ياسەنەۆ كوشەسىندە اۆتوكولىك جارىلىسى سالدارىنان بەلگىسىز ەر ادامنىڭ جاراقات العانىن حابارلاعان. Telegram-ارنالار جارالانعان ادامنىڭ گەنەرال سارۆاروۆ بولۋى مۇمكىن دەگەن بولجام ايتقان.
رف تەرگەۋ كوميتەتى بۇل وقيعا بويىنشا قوعامدىق قاۋىپ توندىرەتىن تاسىلمەن جاسالعان كىسى ءولتىرۋ جانە جارىلعىش زاتتاردىڭ زاڭسىز اينالىمى باپتارى بويىنشا قىلمىستىق ءىس قوزعادى.
«تەرگەۋ بارىسىندا قىلمىستىڭ ءارتۇرلى نۇسقالارى قاراستىرىلىپ جاتىر. سولاردىڭ ءبىرى – بۇل قىلمىستى ۋكراينا ارنايى قىزمەتتەرىنىڭ ۇيىمداستىرۋى مۇمكىن دەگەن بولجام»، - دەلىنگەن ۆەدومستۆونىڭ ءباسپاسوز حابارلاماسىندا.
ۋكراينا تاراپى گەنەرالدىڭ قازاسىنا قاتىستى رەسمي پىكىر بىلدىرگەن جوق.
Shot پەن Baza Telegram ارنالارى تاڭەرتەڭ جارىلىس سالدارىنان تۇرعىن ءۇي ماڭىنداعى تۇراقتا تۇرعان Kia Sorento ماركالى اۆتوكولىكتىڭ زاقىمدانعانىن حابارلاعان.
ربك باسىلىمىنىڭ جازۋىنشا، 56 جاستاعى ەر ادام جارىلىس كەزىندە كولىكتىڭ ىشىندە قىسىلىپ قالىپ، كەيىن قۇتقارىلىپ، اۋىر حالدە اۋرۋحاناعا جەتكىزىلگەن.
